هەواڵ
لیژنەیەك بۆ بەدواداچون پێكهێندرا..قەرەبوو دەكرێنەوە
ئەنجومەنی نوێنەران سەرقاڵی ئامادەكردنی ڕاپۆرتێكە بۆ قەرەبوكردنەوەی ئەو جوتیارانەی بەهۆی سوتاندنی بەرهەمی دانەوێڵەكانیانەوە زیانی زۆریان بەركەوتوە، پەرلەمانتارێكی یەكێتیش لەبەغدا ڕایدەگەیەنێت، "هەوڵی تەواو دەدەین بۆ ئەوەی جوتیاران قەرەبوبكرێنەوە".

بەگوێرەی زانیاریەكان، وەفدێكی ئەنجومەنی نوێنەران لێكۆڵینەوە لەڕوداوەكانی خانەقین دەكات كە لەچەند ڕۆژی ڕابردودا ڕوبەرێكی زۆر دانەویڵەی جوتیاران ئاگری تێبەردراو سوتێندرا.

شێركۆ میروەیس ئەندامی ئەنجومەنی نوێنەران بەSNNی ڕاگەیاند، "دوای ئەوەی فراكسیۆنە كوردستانییەكان یاداشتێكمان لەبارەی بارودۆخی خانەقینەوە ئاراستەی پەرلەمان كرد، سەرۆكی ئەنجومەنی نوێنەران داوای پێكهێنانی لیژنەیەكی كردو ئێستاش لەخانەقینین بەدواداچون لەسەر ئەو كەیسە دەكەین".

وتیشی:"سەردانی ئیدارەی شارو دامودەزگاكان و گوندەكان دەكەین كە زەرەرمەندبون، گفتوگۆمان لەگەڵ جوتیارو هاوڵاتیانی ناوچەكە كردوەو دواتر ڕاپۆرتێك لەبارەی ڕوداوەكە ئامادەدەكەین و دەدەین بەسەرۆكی ئەنجومەن، بۆئەوەی چارەسەری ئەو نائارامییە بكرێت لەناوچەكەدا، لەبەرئەوەی ئێستا خەڵك لەدڵەڕاوكێیەكی گەورەدا دەژین".

پەرلەمانتارەكەی یەكێتیی ڕونیشیكردەوە، "سنوری خانەقین تایبەتمەندی هەیە، چونكە داعش بەپرسیارێتی سوتاندنی دەغڵ و دانەكانی گرتۆتە ئەستۆ، بەڵام لەپارێزگاكانی دیكە بەچەند هۆكارێكی جیا هەمان حاڵەت هەبوەو زەرەو زیانێكی زۆر بەجوتیاران كەوتوە".

ئاماژەی بەوەشكرد، ئێستا پڕۆژەیەك هەیە هەوڵی تەواوی بۆ دەدرێت كە بكرێت بەبڕیارو زەرەرو زیانی سەرجەم جوتیاران قەرەبوبكرێنەوە.

ئەوەشی وت:"هەوڵی تەواو دەدەین قەرەبوكردنەوەی ئەو جوتیارانەی زیانیان بەركەوتوە ببێت بەبڕیارو بچێتە بواری جێبەجێكردنەوە".


SNN:

هەورامان هاشم

 مانگ پێشتر - May 23 2019 4:52PM
Print Friendly and PDF

بابەتی زیاتر
زۆرترین بینراو
  • 24 کاتژمێر
  • هەفتە
  • مانگ
نرخە جیهانیەکان
بۆ بەئاگابوون لە دواین زانیاریەکان
   
Tel: (+53) 320 0475
© Copyright 2018 SNN. All Rights Reserved.