هەواڵ
وەزارەتی پەروەردە چەند بڕیارێكی نوێی دەركرد
وەزارەتی پەروەردەی حكومەتی هەرێم ژمارەیەك بڕیاری تایبەت بە بەخوێندن و پرۆسەی پەروەردە دەردەكات و بۆ ئەمساڵی خوێندنیش، هەردوو وانەی بیركاری و زانست بە زمانی ئینگلیزی هەڵوەشاندەوە.

ئەمڕۆ 19ی 8ی 2019، ئەنجومەنی وەزارەتی پەروەردە كۆبۆوەو ژمارەیەك بڕیاری دەركرد.

دارا ئەحمەد سەمین، بەڕێوەبەری گشتی پەروەردەی گەرمیان، بە SNNی ڕاگەیاند: لەكۆبوونەوەكەدا كە زیاتر لەهەشت كاتژمێری خایاند، ژمارەیەك بڕیاری گرنگ تایبەت بەپرۆسەی پەروەردو فێركردن دەركران.

وتیشی:"یەكێك لەبڕیارەكان هەڵوەشاندنەوەی سیستمی بەئینگلیزیكردنی وانەی بیركاری و زانستەكانە، بڕیارێكی دیكەش داخستنی سەرجەم ئەو سەنتەرانەیە كە خولی بەهێزكرن بۆ خوێندكاران دەكەنەوە، هاوكات بڕیاریشدرا لیژنەیەك پێكبهێندرێت و سەردانی قوتابخانەو باخچەو پەیمانگە ئەهلییەكان بكات، ئەگەر ڕێنماییەكانیان جێبەجێ نەكردبێت، لەحاڵەتی یەكەم سزا دەدرێن و لەحاڵەتی دووەمیش دادەخرێن".

سەبارەت بەدەستپێكی پرۆسەی خوێندنیش، دارا ئەحمەد سەمین وتی: " ڕۆژی 1ی 9ی 2019 دەستبەكاربوونی مامۆستایان دەبێت، ڕۆژی 21ی 9ش یەكەم ڕۆژی دەستپێكی ساڵی خوێندنەو سەرجەم بڕیارەكانیش بۆ ساڵی خوێندنی 2019-2020 جێبەجێدەكرێن".

دەقی بڕیارەكانی ئەنجومەنی وەزارەتی پەروەردە:

- هەڵوەشاندنەوەی پرۆسەی بە ئینگلیزیکردنی هەردوو بابەتی بیرکاری و زاستە گشتییەکان تایبەت بە قۆناخی فێرکردنی بنەڕەتی، کە لە ساڵی خوێندنی 2015 – 2016 وە دەستی پێکردووە، هاوکات بڕیاردرا بۆ گرنگیدان بە خوێندنی زمانی ئینگلیزی، راوێژ و هەماهەنگی لەگەڵ پسپۆرانی بواری زمان لە زانکۆکانی کوردستان بکرێت لەڕێگەی وەزارەتی خوێندنی باڵاوە.

- پێکهێنانی لیژنەیەک لە راوێژکار و بەڕێوەبەری گشتی پەروەردەی پارێزگاکان بە سەرۆکایەتی مامۆستا بورهان عەبدوڵڵا تایبەت بە کەمکردنەوەی رۆتین و شۆڕکردنەوەی دەسەڵاتەکانی کارگێڕی پێویست بۆ بەڕێوەبەرایەتییە گشتییەکان لە پارێزگاکان و پەروەردەی قەزاکان لەگەڵ پیادەکردنی پێوەری چاودێری پێویست.

- پێکهێنانی لیژنەیەکی باڵا بە سەرۆکایەتی وەزیری پەروەردە و ئەندامیەتی هەریەک لە راوێژکاران: بورهان عەبدوڵڵا عادل، بەڕێوەبەری گشتی دیوان مەریوان بەگۆک و بەکر کەریم، لەگەڵ بەڕێوەبەری قوتابخانە و پەیمانگە ناحکومییەکان بە مەبەستی پێداچوونەوە و بەدواداچوون لەبارەی جێبەجێکردنی یاسای ژمارە (14)ـی ساڵی 2012 و رێنمایی ژمارە (1)ـی ساڵی 2016 باخچەو قوتابخانەو پەیمانگا ناحکومییەکان.

- رێگەنەدان بە کردنەوەی خولی بەهێزکردن و وتنەوەی پرۆگرامەکانی خوێندن لەو پەیمانگە پیشەییانەی کە لەلایەن وەزارەتی پەروەردەوە مۆڵەتی پیشەییان پێدراوە، ناکرێت بیناکانیان بەکاربهێنن بۆ مەبەستی ئەنجامدانی وانەکانی بەهێزکردن و وتنەوەی پرۆگرامەکانی خوێندن.

- پێکهێنانی لیژنەیەک بۆ رێکخستنەوەی میلاکاتی مامۆستایان و فەرمانبەران لە سەنتەری پارێزگاکان بە سەرۆکایەتی راوێژکار بورهان عەبدوڵڵا و ئەندامیەتی هەریەک لە بەڕێوەبەرانی گشتی ئەحمەد ئیسماعیل رەحمان، شیلان خەلیل جونێد، جەلال هەمزە کاکەشین، بەڕێوەبەری گشتی پارێزگاکان بۆ ساڵی خوێندنی 2020-2021.

- پێکهێنانی لیژنەیەک بۆ دیاریکردنی میکانیزمێک سەبارەت بە دانانی بانکی پرسیارەکان تایبەت بە ئەزموونەکانی قۆناخی 12ـی ئامادەیی بە سەرۆکایەتی کەریم لەتیف، بەڕێوەبەری گشتی ئەزموونەکان و ئەندامییەتی کاوە عومەر، بەڕێوەبەرانی گشتی پەروەردەی پارێزگاکان. کە پێویستە لە ماوەی چوار مانگدا کارەکانیان تەواوبێت.


SNN:

ڕەنج تاڵیب

 مانگ پێشتر - Aug 19 2019 9:34PM
Print Friendly and PDF

بابەتی زیاتر
زۆرترین بینراو
  • 24 کاتژمێر
  • هەفتە
  • مانگ
نرخە جیهانیەکان
بۆ بەئاگابوون لە دواین زانیاریەکان
   
Tel: (+53) 320 0475
© Copyright 2018 SNN. All Rights Reserved.