هەواڵ
بڕیارەكەی پەروەردە ئەم خوێندنگایانە ناگرێتەوە .. ناوەكان راگەیەنرا
وەوزارەتی پەروەردە داوایەكی بەڕێوەبەرایەتی گشتی پەروەردەی سلێمانی بۆ بەدەركردنی چەند خوێندنگەیەك لەبڕیاری هەڵوەشاندنەوەی سیستمی خوێندنی ئینگلیزی رەتدەكاتەوە، بەڕێوەبەری گشتی پەروەردەی سلێمانیش رایدەگەیەنێت: بڕیارەكە هەموو خوێندنگەكان دەگرێتەوە، جگە لەپێنج خوێندنگە نەبێت.

بەبڕیاری ئەنجومەنی وەزارەتی پەروەردەی حكومەتی هەرێم، سەرجەم ئەو خوێندنگانەی لەساڵی 2015 - 2016ەوە كراون بەئینگلیزی، هەڵدەوەشێنەوەو هەردوو مادەی (بیركاری و زانست) بەزمانی كورد دەخوێنرێن.

دڵشاد عومەر، بەڕێوەبەری گشتی پەروەردەی سلێمانی بە SNNی راگەیاند: بڕیارەكە هەموو خوێندنگەكان دەگرێتەوە كە لەساڵی 2015-2016 كراون بەئینگلیزی، بەڵام خوێندنگەكانی سلێمانی نێودەوڵەتی هاوبەش (سابیس)، كۆمەڵگەی پەروەردەیی كوردستان (كۆری)، رۆز، یوبی هۆڵدین (گەشە) و خوێندنگەی دوارۆژ ناگرێتەوە.

وتیشی: "بڕیارەكە هەموو قۆناغەكانی بنەڕەتی دەگرێتەوە، تەنانەت ئێمە 11 خوێندنگەمان هەیە كە لەپۆلی حەوت بۆ هەشت كراون بەئینگلیزی، ئەوانیش هەڵدەوەشێنەوە، لەبەرئەوەی ئەوانیش لەهەمان ساڵدا كراون بەئینگلیزی".

بەگوێرەی زانیارییەكانی SNN، بەڕێوەبەرایەتی گشتی پەروەردەی سلێمانی بەنووسراوی فەرمی داوایكردووە 41 خوێندنگەی سلێمانی لەبڕیارەكە بەدەر بكرێن، لەوبارەیەشەوە دڵشاد عومەر وتی: "نوسراوەكە رۆژی پێنجشەممەی رابردوو رەوانەی وەزارەتمان كرد، بەڵام لەلایەن وەزیری پەروەردەوە رەزامەندی لەسەر نەدراوە".

وتیشی: "ئەو خوێندنگەیانەی خۆیان پێش ساڵی 2015-2016 میلاكیان هەبووەو پڕۆسەكەیان جێبەجێكردووە، ئەوانیش دەچنە چوارچێوەی بڕیارەكەوەو هەڵدەوەشێنرێنەوە".


SNN:

شاهۆ خوارەحم

 3 هەفتە پێشتر - Aug 24 2019 9:05PM
Print Friendly and PDF

بابەتی زیاتر
زۆرترین بینراو
  • 24 کاتژمێر
  • هەفتە
  • مانگ
نرخە جیهانیەکان
بۆ بەئاگابوون لە دواین زانیاریەکان
   
Tel: (+53) 320 0475
© Copyright 2018 SNN. All Rights Reserved.