هۆكارى كوشتنى پۆلیسه‌كه‌ى كه‌ركوك ئاشكرا بوو
پارێزگاى كه‌ركوك | فۆتۆ: Bnar Sardar \ KirkukNow
SNN
به‌ڕێوه‌به‌رایه‌تى پۆلیسى كه‌ركوك هۆكارى كوشتنى ئه‌و پۆلیسه‌ى ئاشكرا كرد كه ئه‌مڕۆ له‌نێو بازاڕى كه‌ركوك كوژرا و به كرده‌یه‌كى “تیرۆریستى” له قه‌ڵه‌میدا.
ئه‌مڕۆ پێنجشه‌ممه 28ى كانونى یه‌كه‌م، له‌ناو بازاڕى له‌نگه‌ى كه‌ركوك له‌لایه‌ن كه‌سێكى نه‌ناسراوه‌وه دوو پۆلیس درانه‌به‌ر ده‌ستڕێژى گوللـه، له ئه‌نجامدا یه‌كێكیان بریندار بوو و یه‌كێكى تریشیان كه پۆلیسى پاراستنى یاسایه گیانى له‌ده‌ستدا. هاوكات ژنێكیش به هۆى ده‌ستڕێژه‌كه‌وه بریندار بوو.
له‌دواى رووداوه‌كه، راكان جبورى، پارێزگارى كه‌ركوك به وه‌كاله‌ت راگه‌یه‌نراوێكى بڵاوكرده‌وه و رایگه‌یاند، “لێكۆڵینه‌وه‌مان ده‌ستپێكردووه و ده‌ستبه‌جێ تاوانبارى رووداوه‌كه ده‌دۆزینه‌وه”.
هه‌ر له‌و باره‌یه‌وه، كه‌مێك له‌مه‌وبه‌ر، به‌ڕێوه‌به‌رایه‌تى پۆلیسى كه‌ركوك كرده‌وه‌كه‌ى دایه پاڵ داعش و رایگه‌یاند، “دوو رۆژ پێش رووداوه‌كه چه‌كدارانى داعش چاودێرى ئه‌و دوو پۆلیسه‌یان كردووه”.
ئاماژه‌ى به‌وه‌شكرد، “ئه‌وه‌ى روویداوه كرده‌وه‌یه‌كى تیرۆریستیه و له‌لایه‌ن چه‌كدارانى داعشه‌وه ئه‌نجامدراوه”.
به‌پێى زانیارییه‌كان، ئه‌و كه‌سانه‌ى كه برینداربوون، راسته‌وخۆ پاش رووداوه‌كه ره‌وانه‌ى نه‌خۆشخانه كراون، بارى ته‌ندروستى پۆلیسه‌كه ناجێگیره و بارى ته‌ندروستى ژنه برینداره‌كه‌ش جێگیره.
رووداوه‌كه پێشنیوه‌ڕۆى ئه‌مڕۆ له‌كاتێكدا روویداوه كه ئه‌و دوو پۆلیسه به‌مه‌به‌ستى ئه‌نجامدانى كارێكى پێویسته چوونه‌ته بازاڕى له‌نگه‌ى شارى كه‌ركوك.
