حکومەتی هەرێم نەوتە 50 هەزار دینارەکەی بەغدا بە 60 هەزار دینار دەدات بە هاووڵاتییان

SNN-عەلی حەمەسەعید

پرۆسەی ناردنی 50 ملیرن لیتر نەوتی سپی لە بەغداوە بۆ هەرێمی كوردستان دەستپێكردووە و تا ئێستا بەشێك لەو نەوتە گەیشتووەتە پارێزگای هەولێر و سبەینێش بەشێكی دیكەی دەگاتە پارێزگای سلێمانی و بەنرخی 60 هەزار دینار لەو ناوچە شاخاوییەكانە دەستپێدەكات كە لەمساڵدا نەوتیان وەرنەگرتووە، پشكی سلێمانیش 21 ملیۆن لیتر نەوتی سپییە.

بەرپرسێكی بەڕێوەبەرایەتی نەوت و كانزاكانی سلێمانی بە SNN-ی راگەیاند، پرۆسەی ناردنی بڕی 50 ملیۆن لیتر نەوتی سپی لە بەغداوە بۆ هەرێمی كوردستان دەستپێكردووە و چاوەڕوانمان دەكرد ڕۆژی پێنجشەممە بەشێك لەو نەوتە بگاتە كۆگانمان، بەڵام نەگەیشت بۆیە چاوەڕێدەكەین سبەی یەكشەممە پرۆسەی ناردنی نەوت لە بەغداوە بۆ هەرێمی كوردستان دەستپێبكاتەوە و ئێمەش لە پارێزگای سلێمانی بڕی 21 ملیۆن لیترمان بۆ دابیندەكرێت.

ئاماژەی بەوەشكرد، ئەو نەوتە لیتری بە 250 دینار بە هەرێمی كوردستان دەفرۆشرێت بەرمیلێك دەگاتە 50 هەزار دینار، بەڵام كرێی گواستنەوە و ناردنی بۆ شوێنە دوورەكان دەكەوێتە سەر ئەستۆی حكومەتی هەرێم بۆیە بڕی 10 هەزار دینار بۆ هەر بەرمیلێك دەچێتە سەری و بە 60 هەزار دینار دابەدەشدەكرێت بەسەر هاووڵاتیاندا،  سەرەتاش لەو ناوچە شاخاوییانەوە دەستپێدەكات كە لەمساڵدا نەوتیان وەرنەگرتووە بەتایبەت
لە ناوچەكانی قەڵادزێ و پشدەر كە لەمساڵدا هیچ بڕە نەوتێك دابەشنەكراوە.

هەروەها د.بڕیار ڕەشید، ئەندامی ئەنجومەنی نوێنەرانی عێراق بەSNN-ی ڕاگەیاند: ئەو نەوتەی بۆ هەرێمی كوردستان دابینكراوە بەپاڵپشتی د.عزەت سابیر بریكاری وەزارەتی نەوت بڕیاری لێددرا وە كە بڕەكەی 50 ملیۆن لیتر نەوتی سپییە و بڕی 21ملیۆن لیتری بۆ پارێزگای سلێمانی و بڕی 15ملیۆن لیتری بۆ پارێزگای هەولێر و حەوت ملیۆن لیتر بۆ دهۆك و هاوكات بڕی پێنج ملیۆن لیتریش بۆپارێزگای هەڵەبجە تەرخاندەكرێت.