هادی عامری: هیواخوازم یەکێتی لەسەر پەیڕەوی خۆی بمێنێتەوە
SNN
هادی عامری ئەمینداری گشتی رێکخراوی بەدر، لە پەیامێکی پیرۆزباییدا بە بۆنەی یادی دامەزراندنی یەکێتیی نیشتمانیی کوردستان، جەختی لە پەیوەندییەکانی نێوان هەردوولا کردووەتەوە و راشیگەیاندووە: “هیواخوازین یەکێتی لەسەر پەیڕەوی حزبەکەی بمێنێتەوە”.
هادی عامری رایگەیاندووە: “پیرۆزبایی یادی 45 ساڵەی دامەزراندن لە سەرکردایەتی یەکێتیی نیشتمانی کوردستان دەکەن کە ڕۆڵی چارەنوسسازیان لە لەناوبردنی زوڵم و دیکتاتۆریەت و روخانی رژێمی بەعسی فاشیدا بینیووە، هاوکات رۆڵی گەورەشیان لە بنیادنانی دەسەڵاتێکی نوێی گشتگیردا بینی”.
راشیگەیاندووە: “هیواخوازین برایانی یەکێتی لەسەر ئەو پەیڕەوە بمێنێتەوە کە برای گەورەی کۆچکردوو جەلال تاڵەبانی دایڕشتبوو، بەو بۆنەوەیەوە پیرۆزبایی لە سەرکردایەتی و ئەندام و لایەنگرانیان دەکەین”.
وتووشیەتی: “جەخت لە قوڵی پەیوەندییەکانی نێوان رێکخراوی بەدر و یەکێتی دەکەینەوە، سوورین لەسەر ئەو پەیوەندییانە و کاردەکەین بۆ بەهێزترکردنیان، بەتایبەت لەم کاتە هەستیارە لە مێژووی عێراق”.
