دادگایکردنی تۆمەتبارانی کەیسی خاشقچی لە تورکیا دەستیپێکرد
SNN
لە دادگای سزادانی ئیستانبوڵ، دانیشتنەکانی تایبەت بە دۆسیەی کوژرانی رۆژنامەنووس جەمال خاشقچی دەستیپێکرد.
لە کەیسەکەدا 20 کەس بە تۆمەتی کوشتنی ئەو رۆژنامەنووسدا دادگایی دەکرێن، هەرچەندە تۆمەتبارەکان تا ئێستا دەستگیر نەکراون و ئامادەی دانیشتنەکەی دادگاش نەبوون، بەڵام خەدیجە جەنگیز-ی دەستگیرانی خاشقچی وەک سکاڵاکاری دۆسیەکە چووە بەردەم دادگا و ئیفادەی خۆی دا.
لە دانیشتنەکەدا سکاڵانامەی تایبەت بە دۆسیەکە بە کورتی خوێندرایەوە.
لە سکاڵانامەکەدا کە 117 لاپەڕە پێکهاتبوو باس لەوە کرا کە جەمال خاشقچی یەکێک بوو لە رۆژنامەنووسە دیارەکانی رۆژهەڵاتی ناوەڕاست و لە رۆژنامەی واشنتن پۆست کاری کردوە، بەڵام رۆژی دووی تشرینی یەکەمی 2018 سەردانی کونسوڵخانەی سعوودیەی لە ئیستانبوڵ کردوە و لە ناو بینای کونسوڵخانەدا کوژراوە.
ئاماژە بەوەش دراوە کە دوو لە تۆمەتبارەکان بە ناوەکانی ئەحمەد بن محەمەد ئەلئەسیری و سعوود ئەلقەحتانی فەرمانی کوشتنی خاشقچییان بە تۆمەتبارەکانی دیکە داوە، هەربۆیە بە تۆمەتی “پلاندانان و هەوڵدان بۆ کوشتنی مرۆڤ بەشێوەیەکی دڕندانە” سزای زیندانی هەتاهەتایی قورسکراویان بۆ داوا کراوە.
هەروەها هەژدە تۆمەتبارەکەی دیکەش کە پەیوەندیداربوون بە بڕیاری کوشتنی جەمال خاشقچی، پلانی تاوانەکەیان داناوە و کارەکانیان لەنێوخۆیاندا دابەشکردوە بە تۆمەتی “پلاندانان و هەوڵدان بۆ کوشتنی مرۆڤ بەشێوەیەکی دڕندانە” بۆ هەر یەکەیان بەشێوەیەکی جیا داوای سزای زیندانی هەتاهەتایی کراوە.
کەیسی کوژرانی جەمال خاشقچی یەکێک بوو لەو کەیسانەی زۆرترین کاردانەوە و ئیدانەی نێودەوڵەتی بەدوای خۆیدا هێنا، بەشێک لە وڵاتان خێزانی شاهانەی سعودیەیان تۆمەتباردەکرد بەوەی فەرمانی بە کوشتنی ئەو رۆژنامەنووسە داوە، مافەکانی مرۆڤ لە سعودیە و پشتیوانییەکانی ئەمریکاش بۆ ئەو وڵاتە خرایە ژێر پرسیارەوە.
