وەزیری دەرەوەی فەرەنسا: هاوکاری تەندروستی دەگەیەنینە هەرێمی کوردستان

SNN

وەزیری دەرەوەی فەرەنسا جەختی لە هاوسۆزی و پشتیوانییەکانی وڵاتەکەی بۆ هەرێمی کوردستان کردەوە و راشیگەیاند: “فەرەنسا بە چەندین پڕۆژەی جیاواز هاوکاری هەرێم دەکات و لە چەند رۆژی داهاتوودا هاوکاری تەندروستیش بۆ هەرێم دەنێرێت”.

ژان ئیف لۆدریان وەزیری دەرەوەی فەرەنسا لەدوای کۆبوونەوەیەکی لەگەڵ نێچیرڤان بارزانی سەرۆکی هەرێم لە کۆنفرانسێکی رۆژنامەنووسیدا رایگەیاند: “فەرەنسا هاوکاری تەندروستی دەگەیەنێتە هەرێمی کوردستان تا بتوانێت باشتر رووبەڕووی ڤایرۆسی کۆرۆنا ببێتەوە، هاوکات یارمەتی دەگەیەنینە نەخۆشخانەی هەڵەبجە”.

لۆدریان باسی لە پڕۆژەکانی وڵاتەکەی کرد لە هەرێمی کوردستان و وتی: “هەروەک چۆن لە مانگی تشرینی یەکەمی ساڵی رابردوودا بەڵێنمان دابوو، هاوکاری ئاوارەکانی کەمپی بەردەڕەش دەکەین”.

وتیشی: “بە هەماهەنگی لەگەڵ ئەڵمانیا بە بڕی 15 ملیۆن یۆرۆ، فەرەنسا پڕۆژەیەکی تایبەت بە ئاو و ئاوەڕۆ لە سنووری پارێزگای دهۆک جێبەجێ دەکات”.

ئاماژەی بەوەشکرد: “لە بوارەکانی پەروەردەدا هاوکاری هەرێم دەکەین، جگە لەوەش ئاژانسی پەرەپێدانی فەرەنسی بە هەماهەنگی لەگەڵ زانکۆی ئەمریکی لە سلێمانی، پشتیوانی گەنجانی کورد دەکات”.

لە درێژەی قسەکانیدا، وەزیری دەرەوەی فەرەنسا رایگەیاند: “هاوسۆزین بەرامبەر بە گرژییەکانی هەرێم و عێراق کە هاووڵاتیان بەهۆیەوە بوونەتە قوربانی یاخود باجەکەی دەدەن، هەروەک چۆن هاوسۆزین بەرامبەر ئەو قەیرانە داراییەی کە بەهۆی ڤایرۆسی کۆرۆناوە رووبەڕووی ناوچەکە بووەتەوە، لەکاتێکدا فەرەنسا و وڵاتانی جیهانیش تووشی بوون”.

باسی لەوەشکرد: “جەخت لە جوامێری حکومەتی هەرێم دەکەینەوە کە ئاوارەی سووریایان لەخۆگرتووە”.

لە بەرامبەریشدا نێچیرڤان بارزانی سوپاسی لۆدریانی کرد لەبەرامبەر هاوکاری و پشتیوانییە بەردەوامەکانی وڵاتەکە بەتایبەت لە شەڕی دژ بە داعشدا و وتیشی: هێشتا هەرێم و عێراق پێویستیان بە پشتیوانی فەرەنسا و هاوپەیمانان هەیە.