بافڵ تاڵەبانی و مەسرور بارزانی پەیوەندی تەلەفۆنییان ئەنجام دا

SNN

نووسینگەی سەرۆکی حکومەتی ھەرێمی کوردستان روونکردنەوەیەک بڵاودەکاتەوە و تێیدا، مەسرور بارزانی سەرۆکی حکومەتی هەرێمی کوردستان و بافڵ تاڵەبانی هاوسەرۆکی یەکێتیی نیشتمانیی کوردستان پەیوەندی تەلەفۆنییان ئەنجام دا.

پەیوەندییە تەلەفۆنییەکە، پەیوەست بە ئەو کێشانەیە کە لەبارەی کۆبوونەوەی پەرلەمانی کوردستان لە ئارادابوون، ھەندێک ھەواڵ و لێکدانەوەی ناڕاست لە میدیاکاندا بڵاو بوونەتەوە.

دەقی روونکردنەوەکەی نووسینگەی سەرۆکی حکومەتی ھەرێمی کوردستان:

راستیی بابەتەکە بەو شێوەیەیە کە لە میانەی پەیوەندییەکی تەلەفۆنیی نێوان بەڕێزان مەسرور بارزانی سەرۆکی حکومەت و بافڵ تاڵەبانی ھاوسەرۆکی یەکێتیی نیشتمانیی کوردستان، ئەو کێشەیە تاووتوێ کرا و بەڕێز بافڵ تاڵەبانی داوای دواخستنی کۆبوونەوەی پەرلەمانی بۆ 24 کاتژمێر کرد بەبێ ھیچ مەرجێک، تاکو دەرفەت بۆ سەرکردایەتیی ھەردوولا ھەبێت بە تێگەیشتنێکی ھاوبەش بگەن، ئەم داوایە بە چارەسەرێکی پەسەند زانرا و بە دانوستان لە نێوان سەرۆکایەتی پەرلەمان و سەرکردایەتیی ھەردوولا کۆبوونەوەی پەرلەمان بۆ 24 کاتژمێر دواخراوە بە بێ ھیچ مەرجێک و بوار رەخسێندراوە لەو ماوەیەدا بەربەست و کێشەکان چارەسەر بکرێن.

بەو ھیوایەی کە گشت لایەک بەرپرسیارانە مامەڵە لەگەل ئەم بابەتانە بکەن و بە ئاڕاستەی چارەسەر، ھەواڵ و لێکدانەوەکان بگوازنەوە.

نووسینگەی سەرۆکی حکومەتی ھەرێمی کوردستان
26ی تەمموزی 2020