“بڵاوبوونه‌وه‌ى كۆرۆنا و داخستنى پاڵاوگه‌كان ژینگه‌ى هه‌ولێرى پاككردووه‌ته‌وه”
منارى چۆلى له شارى هه‌ولێر | فۆتۆ: Kovan Katuli
SNN – مەودا مستەفا
سەرۆکی رێکخراوی (ئاڤیار)ی ژینگەی رایدەگەیه‌نێت: بەهۆی قەدەغەی هاتووچۆ و بڵاوبوونەوەی کۆرۆنا به راده‌یه‌کی باش پیسبوونی ژینگە کەمبووه‌تەوە.
ئاسۆ شکاک، سەرۆکی رێکخراوی ئاڤیاری ژینگەیی لە کۆنفڕانسێکی رۆژنامەوانیدا بە ناوی رێکخراوەکانی تایبەت بە پاراستنی ژینگە رایگه‌یاند: “ژینگەی پاک یەکێکە لە پێداویستیيە سەرەکیەکانی ژیانی تاک، بەهۆی بڵاوبوونەوەی کۆرۆناوه تاڕادەیەک گرفتە ژینگەییەکان و پیسبوونی ژینگە چارەسەر بوون، چونكه بڵاوبوونه‌وه‌ى ئه‌و ڤایرۆسه بووه هۆكارى داخستنی کارگەكان، پاڵاوگەکان و کەمبوونەوەی بەکارهێنانی ئۆتۆمبێل، بەڵام بەداخەوە وردەوردە خەریکە جارێکی تر ژینگە پیس دەکرێتەوە، بۆیە چەند داواکاریەک ئاڕاستەی لایەنی پەیوەندیدار و هاووڵاتییان دەکەین”.
وتیشى: “داوا دەکەین سەربڕینی ئاژەڵی قوربانی لە سەربڕخانەکان بێت، ئەگەر لە دەرەوەش بێت پێویستە رەچاوی مەرجی تەندروستی و ژینگەیی بکرێت و پاشماوەکان بخرێنە کیسی تایبەت تاوەکو تیمی شارەوانی هەڵیان دەگرێت، بۆ ئاژەڵە بێلانەکانیش داوا دەکەین هاووڵاتییان خواردنی پێویستیان بۆ دابنێن چ لە سەربانی ماڵەکان بێت یان کۆڵانەکان”.
سەرۆکی رێکخراوی ئاڤیاری ژینگەیی ئه‌وه‌شى خسته‌ڕوو: “لەپێناوی خۆپاراستن داوا لە هاووڵاتییان دەکەین دەستکێش و دەمامک لەسەر شەقامەکان فڕێ نەدەن، ئەو کۆمپانیایانەشی بوونەتە هۆکاری پیسبوونی ژینگە قەرەبووی ژینگەی هەرێم بکەنەوە بەپێی یاسا، لایەنە پەیوەندیدارەکانیش رێکاری پێویست بگرنەبه‌ر بۆ پاکڕاگرتنی ژینگە”.
