داود ئۆغلو هێرشی تووند دەکاتە سەر ئەردۆغان و زاواکەی

SNN

سەرۆکوەزیرانی پێشووتری تورکیا هێرشێکی توند دەکاتە سەر ئەردۆغان و زاواکەی بەوەی بوونەتەهۆی داڕمانی لیرە و ئابووریی تورکیا.

ئەحمەد داود ئۆغلو کە هاوکات سەرۆکی پارتی ئایندەشە، لەبەردەم لایەنگرانی حزبەکەی وتی: “کاتێک ساڵی 2016 من سەرۆکوەزیران بووم نرخی یەک لیرە بەرامبەر بە دۆلار 2.85 لیرە بوو، بەڵام ئەمڕۆ بە 7.30 لیرەیە، پارەکەمان 155٪ نرخ و بەهای خۆی لەدەستداوە بەرامبەر بە پارە بیانییەکان”.

وتیشی: “ئەوانەی بوونەتەهۆی ئەوەی پارەی تورکیا بەم دۆخەی ئەمڕۆ بگات، دەبێ باجی ئەو کارەیان بدەن”.

داود ئۆغلو راشیگەیاند “لە ساڵی 2018ەوە پێچەوانەی هەموو بازاڕەکانی دراو لە جیهاندا داتەپینی بەرچاو لە ئابووری تورکیا روویداوە و لیرەی تورکی 60٪ی بەهای خۆی لەدەستداوە”.

وتیشی: “لە ئێستادا لە تورکیا گەر رەخنە لە دەسەڵات بگریت تۆمەتبارت دەکەن بە خیانەت، بەڵام ئەوە خائینی سەرەکییە لەم وڵاتە کە تورکیای بەم رۆژە گەیاند”.

ئاماژەی بەوەشدا کە بیرات ئەلبێرک وەزیری دارایی و زاوای ئەردۆغان ئابووری وڵاتی بەرەو هەڵدێر بردووە و هیچ وەڵامێکیشی نییە بۆ رەخنەکان کە ئاڕاستەی دەکرێن.