لە رووداوێکی هاتووچۆدا 8 کەس بوونە قوربانی

SNN-عەلی حەمە سەعید
لە دوو ڕووداوی هاتووچۆدا و بەهۆی وەرگەڕانی ئۆتۆمبێل لەسەر ڕێگای عەربەت – سلێمانی، دوو كەس گیانیانلەدەستدا و چواری دیكەش بریندار بوون، هاوكات بەهۆی بەربوونەوەی ئۆتۆمبێلێكی دیكە بەسەر خێزانێكدا لەسەیرانگای ئاوێسەر منداڵێك گیانی لەدەستدا و یەكێكی دیكەش بریندار بوو.

ئەفسەرێكی بنكەی هاتووچۆی ناحیەی عەربەت بە SNN ی وت: “درەنگانێكی شەوی ڕابردوو لە ئەنجامی وەرگەڕانی ئۆتۆمبێلێك جۆری قەمەرە لەسەر ڕێگای سەرەكی عەربەت – سلێمانی گیانلەدەستدانی دوو كەس و بریندار بوونی چواری دیكەی بەدواوە بوو كە سەرجەمییان سەرنشینی ئەو ئۆتۆمبێلە بوون”.

ئاماژەی بەوەشكرد، ڕووداوەكە بەهۆی تیژڕەویی شۆفێری ئۆتۆمبێلەكەوە بووە و لە ئەنجامدا كۆنترۆڵی لەدەستداوە و ئەو ڕووداوەی لێكەوتووەتەوە كە سەرنشینەكانی خەڵكی سنووری پارێزگای هەڵەبجەن.

لەلایەكی دیكەوە و هەر شەوی ڕابردوو لە ئەنجامی بەربوونەوەی ئۆتۆمبێلێك لە سەیرانگای ئاوێسەر لە ناوچەی هەورامان بەسەر خێزانێكدا دوو منداڵی ئەو خێزانە دەشێلێت، بەوهۆیشەوە منداڵێكیان گیانلەدەستدەدات و منداڵێكی دیكەیان بەسەختی بریندار دەبێت.