کازمی: عێراق هێشتا پێویستی بە هاوکاری ئەمریکایە

SNN

مستەفا کازمی رایگەیاند: عێراق هێشتا پێویستی بە هاوکاری ئەمریکایە لە رووبەڕووبوونەوەی مەترسییەکانی داعشدا، وتیشی حکومەتەکەی پابەندە بە چاکسازی لە کەرتی ئەمنیدا.

سەرۆکوەزیرانی عێراق لە چاوپێکەوتنێکیدا لەگەڵ ئاژانسی ئەسۆشیەیتد پرێس وتوویەتی: “سوپای عێراق پێویستی بە پشتیوانی زەمینی راستەوخۆ نییە، ئەو هاوکاریەی کە باسیشی لێوەدەکرێت لەسەر جۆری هەڕەشە و مەترسییەکان دەگۆڕێت”.

لە بەشێکی دیکەی چاوپێکەوتنەکەیدا، پرسیاری لەبارەی دوایین گفتوگۆ و دانیشتنەکانی لەگەڵ بەرپرسانی ئێراندا لێکرا و سەبارەت بەوەی کە ئایا هیچ نامەیەک لە ئێرانەوە دەگەیەنێتە ئەمریکا، کازمی وتی: “ئێمە رۆڵی پۆستەچی نابینین”.

سەبارەت بە رفاندنی هێلا مێویس ژنە هونەرمەندی ئەڵمانی لە عێراق، کە دواتر ئازادکرا، کازمی وتی: “ئەم جۆرە کردەوانە دەرئەنجامی شەڕ و ئاڵۆزی چەندین ساڵەی وڵاتەکەن، سیاسەتکردن و ئیدارەدانی خراپ هۆکاری روودانی کردەوەی لەو شێوەن، هیچ گومانێکمان نییە لەوەی مەبەست لە رفاندن و کردەی هاوشێوە تێکدانی سەقامگیری و ئاسایشی وڵاتەکەیە”.

هەر لەبارەی ئاسایشی عێراقەوە وتی: “پابەندین بە چاکسازی لە دام و دەزگا ئەمنییەکاندا و بەهێزکردنی تواناکانیان بەجۆرێک کە بتوانن رووبەڕووی ئەم جۆرە ئاڵنگارییانە ببنەوە، ئەو ئەندامانەی هێزە ئەمنییەکانیش کە نەیانتوانیووە پارێزگاری لە هاووڵاتییان بکەن پێویستە بەسزا بگەیەندرێن، کۆتایی بە گروپە چەکدارییە نایاساییەکانیش بهێندرێت”.

لەبارەی کەیسی کوشتنی هیشام هاشمی شرۆڤەکاری دیاری عێراقیش وتی: “حکومەتەکەم بەڵێنیداوە کە بکوژانی بدۆزێتەوە، بەرەوپێشچوونیش لە کەیسی کوژرانی خۆپیشاندەرانی عێراقیدا هەبووە و لە بەسزاگەیاندنی تاوانباران بەردەوام دەبین”.