سەرۆکی فەڕەنسا سەردانی عێراق دەکات

SNN

سەرچاوەیەک لە وەزارەتی دەرەوەی عێراق رایگەیاند “هەفتەی داهاتوو ئیمانوێل ماکرۆن سەرۆک کۆماری فەڕەنسا سەردانی عێراق دەکات و لەگەڵ سێ سەرۆکایەتییەکە کۆدەبێتەوە”.

ئاژانسی هەواڵی میهر ئاشکرایکردووە کە سەرچاوەیەکی ئاگادار باسی ئەوەی کردووە سەرۆکی فەڕەنسا بەسەردانێک دێتە عێراق و لەسەر کێشە هەنووکەییەکان لەگەڵ بەرپرسانی بەغدا کۆبوونەوەی دەبێت.

هاتنی سەرۆکی فەڕەنسا لەکاتێکدایە کە لە ماوەی رابردوودا مستەفا کازمی سەرۆکوەزیرانی عێراق سەردانی هەریەک لە وڵاتانی ئێران و ئەمریکا و ئوردونی کردبوو.

مستەفا کازمی، سه‌رۆكوه‌زیرانى عێراق دوێنێ سێشەممە گەیشتە عەمانی پایتەختی ئوردون بە مەبەستی بەشداریکردنی لە کۆبوونەوەی لوتکەی سێقۆڵی لەگەڵ شای ئوردون، شا عەبدوڵای دووەم و سەرۆکی میسڕ عەبدولفەتاح سیسی.

چاوەڕێشدەکرێت مستەفا کازمی سەرۆکوەزیرانی عێراق پاش ئەوەی سەردانەکەی بۆ ریاز دواخرا بەهۆی نەخۆشکەوتنی شا سەلمانەوە، لە ئایندەیەکی نزیکدا بچێتە عەرەبستانی سعودییە.