مستەفا ئەدیب بۆ پۆستی سەرۆکوەزیرانی لوبنان راسپێردرا
SNN
سەرۆکی لوبنان لەدوای کۆبوونەوەی لەگەڵ سەرۆکی کوتلەی کۆمەڵەی حزبوڵای لوبنان، بە فەرمی مستەفا ئەدیب-ی راسپاد بۆ پێکهێنانی حکومەتی نوێی وڵاتەکە.
بەڕێوەبەرایەتی گشتی سەرۆکایەتی لوبنان ئەمڕۆ لە بەیاننامەیەکدا بڵاویکردەوە، لە پاش ئەوەی شەوی رابردوو زۆرینەی پەرلەمانتارانی لوبنان پاڵپشتی خۆیان بۆ مستەفا ئەدیب دەربڕی، ئەمڕۆ میشێل عەون، سەرۆککۆماری لوبنان ئەدیبی راسپارد بۆ پێکهێنانی حکومەتی نوێ لە وڵاتەکە.
ئاماژەی بەوەشکرد: پێش ئەوەی ئەدیب رابسپێردرێت بۆ حکومەتی نوێی لوبنان، لەگەڵ سەرۆککۆمار و سەرۆکی پەرلەمانی وڵاتەکە کۆبوەتەوە.
ئەدیب لە دوای ساڵی 2013ەوە وەک باڵیۆزی لوبنان لە بەرلین کاریکردوە، هەروەها راوێژکاری نەجیب میقاتی، سەرۆک وەزیرانی پێشوتری لوبنان بووە.
