مانچستەریونایتد هەنگاوێک بۆ گواستنەوەی گاریس بەیڵ دەنێت

SNN Sport

راپۆرتە رۆژنامەوانییە بەریتانیەکان بڵاویانکردووەتەوە، یانەی مانچستەریونایتد دەیەوێت ئەستێرەی یانەی ریاڵ مەدرید گاریس بەیڵ بۆ ریزەکانی بگوازێتەوە، ئەمەش پاش شکستهێنانی لە گواستنەوەی سانچۆی یاریزانی یانەی بروسیا دۆرتمۆند.

هەروەها گاریس بەیڵیش لە ئێستادا بە شوێنی یانەیەکی نوێ دەگەڕێت، چونکە ئەو یاریزانە دڵنیایە کە زیدانی راهێنەر لە وەرزی نوێ پشت بە تواناکانی نابەستێت.

رۆژنامەی دەیلی ئێکس پرێسی بەریتانی بڵاویکردووەتەوە، یانەی مانچستەریونایتد جارێکی تر گرنگی بە گواستنەوەی ئەو یاریزانە دەدات، دەیەوێت لە گواستنەوەکانی ئەم هاوینە بۆ ریزەکانی بگوازێتەوە، چونکە یانەی مانچستەریونایتد لە ئێستادا بۆی یەکلا بووەتەوە گواستنەوەی بەیڵ لە گواستنەوەی سانچۆ کەمتری تێدەچێت،کە یانە ئەڵمانیەکە داوای 110 ملیۆن پاوەنی  بۆ دەستبەرداربوون لە سانچۆی ئینگلیزی دەکرد.

لە لایەکی ترەوە رۆژنامەی مۆندۆ دیپۆرتیڤۆ بڵاویکردووەتەوە، دوای ئەوەی یانەی ریاڵ مەدرید بێبەرامبەر جەیمس رۆدریگێزی بە یانەی ئێڤەرتۆن دا، نایەوێت بێبەرامبەر ئەم یاریزانە بفرۆشێت، یانەی شاهانە دەیەوێت بڕی 20 ملیۆن یۆرۆی لە فرۆشتنی دەستبکەوێت.

گاریس بەیڵ نرخی لە ئێستادا زۆر دابەزیوە،مووچەیەکی زۆریش ساڵانە لە یانەی ریاڵ مەدرید وەردەگرێت، یانەکەی نایەوێت چیتر ئەو مووچە زۆرە بەو یاریزانە بدات و  دوو ساڵیش لە گرێبەستەکەی ماوە.