هاووڵاتییەکی ئێرانی بە گومانی خنکاندنی خێزانە کوردەکە دەستگیرکرا

SNN
دەسەڵاتدارانی فەڕەنسا کەسێکی ئێرانییان دەستگیر کرد بە گومانی دەست هەبوونی لە رووداوی نقومبوونی ئەو  بەلەمەی هەفتەی رابردوو بەهۆیەوە خێزانێکی 5 کەسیی خنکان.

بەپێی ڕاپۆرتێک کە میدیاکانی فەڕەنسا بڵاویانکردووەتەوە، ئەو بەلەمە بەرەبەیانی ڕۆژی سێشەممە 27ی ئەم مانگە لە ئاوەکانی کەناڵی مانش لە نێوان فەڕەنسا و بەریتانا نقومبووە و 27 پەناخوازی تێدابووە کە پێنج کەسیان گیانیانلەدەستداوە.

ئەو کەسەی دەستگیر کراوە گوایە شۆفێری بەلەمەکە بووە و سەرەڕای نالەباریی کەشوهەوا، لە کامپی گراند سینس لە نزیک دۆنکیرک کۆچبەرەکانی بردووە بەرەو بەریتانیا کە 22 کەسی هەڵگرتووە.

سباستیان بیف داواکاری گشتی دۆنکیرک دەڵێت: “وتەیان لە 13 رزگار بوو وەرگرتووە و دەرکەوتووە کە ئەو کەسە قاچاخچی بووە و پەیوەندی لەگەڵ تۆڕێکی بە قاچاخبردنی مرۆڤەوە هەبووە”.

بەپێی میدیاکانی فەڕەنسا ئەو کەسە ئێرانییەی دەستگیر کراوە، گەر تاوانەکەی بەسەردا ساغ ببێتەوە، 10 ساڵ زیندانی دەکرێت و دواتریش دیپۆرت دەکرێتەوە.

ناسنامەی ئەو کەسانەی کە خنکاون، ڕەسووڵ ئێران نیژاد تەمەن 35 ساڵ، شیوا محەمەدپەناهی تەمەن 35 ساڵ، ئانیتا  ئێران نیژاد تەمەن 9 ساڵ، ئارمین  ئێران نیژاد تەمەن 6 ساڵ، ئارتین  ئێران نیژاد تەمەن 15 مانگ بوون.

جێگای ئاماژەیە کە تەرمی چوار کەسی ئەو بنەماڵەیە لەلایەن تیمەکانی رزگاریی فەڕەنساوە دۆزراونەتەوە، بەڵام هەتا ئێستا تەرمی ئارتینی 15 مانگ نەدۆزراوەتەوە.