دوابەدوای خوێندنی ناوپۆل خوێندنی ئەلیكترۆنیش راگیرا

SNN-عەلی حەمە سەعید
دوای ئەوەی لە سەرەتای ئەم مانگەوە بۆ ماوەی مانگێك خوێندن لەناو پۆل راگیرا و داوا لە مامۆستایان و قوتابیان كرا پشت بە خوێندنی ئەلیكترۆنی ببەستن، بەڵام لە ئێوارەی ئەمڕۆوە خوێندنی ئەلیكترۆنیش راگیراوە، بەرپرسانی وەزارەتی پەروەردەش ئامادەنین لەسەر ئەو بابەتە قسە بكەن.

لەدوای سەرهەڵدانی ڤایرۆسی كۆرۆنا، وەزارەتی پەروەردە بۆ قەرەبووكردنەوەی خوێندن ماڵپەڕی قوتابخانەی ئەلیكترۆنی، خستەكار كە ماڵپەڕێكی تایبەتە بە خوێندنی ئەلیكترۆنی پۆلەكانی( 3ی بنەڕەتی تا 11 ئامادەیی ) مامۆستایان و قوتابیان كۆدی تایبەتی خۆیان هەیە و دەتوانن بچنە ناو ئەو ماڵپەڕەوە، بەڵام لە ئێوارەی ئەمڕۆوە ئەو ماڵپەڕەش لەكاركەتووە.
SNN بۆ وەرگرتنی زانیاری لەسەر ئەو بابەتە پەیوەندی بە وەزارەتی پەروەردە كرد بەڵام ئامادە نەبوون لەسەر ئەو بابەتە لێدوان بدەن، بەرپرسێک لە وەزارەت تەنیا ئەوەندەی وتبوو كە “لە ئێستادا ماڵپەڕەكە لەكاركەوتووە بەشی ئایتی وەزارەتی پەروەردە لە هەوڵی چارەسەر كردنی گرفتەكەدان”، بە بێ‌ ئەوەی بزانێت كەی ئەو گرفتە چارەسەر دەكرێت.

ماڵپەڕی ئەلیكترۆنی وەزارەتی پەروەردە بەناونیشانی(www.ewane.krd) ماوەی زیاتر لە مانگێكە دەستی بەكاركردووە بەڵام بەشێكی زۆری مامۆستایان و قوتابیان نەیانتوایوە وەك پێویستی سودی لێوەربگرن.