هەڤاڵ ئەبوبەکر: رەوشی سلێمانی لەژێر کۆنتڕۆڵدایە

SNN

پارێزگاری سلێمانی رایگەیاند، رەوشی تەندروستی سلێمانی لەژێر کۆنتڕۆڵدایە و بەشێکی زۆری هاووڵاتیانیش پابەندن بە رێنماییەکانەوە.

هەڤاڵ ئەبوبەکر پارێزگاری سلێمانی لە چاوپێکەوتنێکیدا لەگەڵ بەشی کوردی کەناڵی فەرمی حکومەتی عێراق ئاماژەی بەوەشکردووە: “ئەو حاڵەتە نوێیانەی ڤایرۆسی کۆرۆنا کە تۆمارکراون لە ئەنجامی پشکنینەکانی تیمەکانی تەندروستی بووە، واتە خۆمان بەدوایاندا گەڕاوین، بەو پێیەش دەتوانرێت بوترێت بارودۆخەکە لەژێر کۆنتڕۆڵدایە و جێی مەترسی نیە”.

سەبارەت بە پابەندبوونی هاووڵاتیان بە رێنماییە تەندروستییەکانەوە، د.هەڤاڵ رایگەیاند: “جگە لە بەشێکی کەم لە هاووڵاتیان و کاسبکاران کە پابدنی مەرجەکانی تەندروستی نین، ئێمە لە هەرە زۆری هاووڵاتیان رازین”.

ئەمە لەکاتێکدایە، دوێنێ نۆ حاڵەتی نوێی کۆرۆنا لە پارێزگای سلێمانی و یەک حاڵەتیش لە هەولێر تۆمارکران، بەوەش تا ئێستا ژمارەی ئەو کەسانەی کە لە ژێر چاودێری پزیشکیدان بۆ 36 کەس بەرزبووەوە.