پوتین: تورکیا دەبێتە وڵاتێکی خاوەن وزەی ئەتۆمی

SNN

ڤلادیمیر پوتین سەرۆکی رووسیا رایگەیاند: “وێستگەی وزەی ئەتۆمی ئاککویو یەکێکە لە پڕۆژە هەرە گەورە هاوبەشەکان لە مێژووی تورکیا و رووسیا و رۆڵی هەیە لە پێشخستنی پەیوەندییەکانماندا”.

ڤلادیمیر پوتین لە میانی بەشداریکردنی بەشێوەیەکی راستەوخۆ لە رێوڕەسمی به‌سووتەمەنییكردنی ئەتۆمی بۆ وێستگەی هێزی ئەتۆمیی ئاککویو، وتاریکی پێشکەش کرد و تیایدا ئاماژەی بەوە کرد لەمەودوا تورکیا دەبێتە وڵاتێکی خاوەن وزەی ئەتۆمی کە یەکێکە لەو سەرچاوانەی کەمترین تێچووی هەیە لە جیهاندا و وتی: “وێستگەی وزەی ئەتۆمی ئاککویو یەکێکە لە پڕۆژە هەرە گەورە هاوبەشەکان لە مێژووی تورکیا و رووسیا و رۆڵی هەیە لە پێشخستنی پەیوەندییەکانماندا”.

پوتین ئاماژەی بەوە کرد هەرکاتێک وێستگەی هێزی ئەتۆمیی ئاککویو-ی تورکیا بە تەواوی تواناکانی بکەوێتەکار، ئەگەری هەیە ئیتر گازی سرووشتیی کەمتر بۆ تورکیا دابین بکەن و وتی: “وەکو دەزانن گازی سرووشتی لەمرۆماندا بەرهەمێکی گرانە و گرانتریش دەبێت. تورکیا بە هۆی ئەوەی دەبێتە خاوەنی پیشەسازیی ئەتۆمیی خۆی ئیتر دەبێتە وڵاتێکی خاوەن وزەی ئەتۆمی کە یەکێکە لەو سەرچاوانەی کەمترین تێچووی هەیە لە جیهاندا”.

وتیشی: ” هەردوو وڵات لە بازاڕەکانی یەکتردا و لە بواری گەشتیاریدا زیاتر چالاک بن، بۆ ئەمەش بڕیارمان دا ژمارەی گەشتە ئاسمانییەکان زیاد بکەین”.

سەرۆکی رووسیا هه‌روه‌ها باسی لەوەشکرد: “سیستەمی وێستگەی ئەتۆمی ئاککویو یەکێکە لە سیستەمە ئاسایشپارێزراوە هەرە مۆدێرن و متمانەپێکراوەکان”.