راگەيەندراوێک لە وەزارەتی داراييەوە

SNN

بەڕێوبەرایەتی گشتی بانکە پسپۆڕیەکانی وەزارەتی دارایی  رايگەياند: ئەوکەسانەی فەرمانبەرن و بونەتە کەفیلی ھاووڵاتی و قەرزەکانیان نەگەڕاندوەتەوە، یەک لە سەر پێنجی مووچەی مانگانەيان دەبڕدرێت.

بەڕێوبەرایەتی گشتی بانکە پسپۆڕیەکانی وەزارەتی دارایی لە راگەيەندراوێکدا ئاماژەی بەوەکرد: پێدانی قەرزو بەدەستهێنانەوەی بەپێی یاسای عێراقی ئەنجامدراوە و لەساڵانی ڕابردودا حکومەتی هەرێم و وەزارەتی دارایی ڕەچاوی قەیرانی داراییان کردووە و ئاسانکاری زۆریان پێشکەش کردووە بۆ چۆنیەتی گەڕاندنەوەی قەرزەکان و چەند جارێک بە بڕیاری ئەنجومەنی وەزیران لێخۆشبونی تەواو کراوە لە هەموو ( سزا ) کەڵەکەبووەکان و داشکاندنی ١٥ ٪ بۆ کۆی گشتی قەرزەکان .

راشيگەياند: ئەم ڕێنماییە ( ڕێنمایی ژمارە ٩ )  لە بنەڕەتدا بۆ کارئاسانی قەرزار و کەفیلەکان دەرچووە و لەبڕی ئەوەی کۆی مووچەی کەفیلەکە ڕابگیرێت، لەمەودوا تەنها ٥/١ ( یەک لە سەر پێنجی ) مووچەکەی مانگانە دەبڕدرێت، ئەوەش کاتێک ئەگەر قەرزار ئامادە نەبوو لەماوەی دوو مانگدا قەرزە کەڵەکەبووەکان بگەڕێنێتەوە.

ئاماژەی بەوەشکرد: لێبڕینی ڕێژەیەک لە مووچەی کەفیل بەیاساو بڕیاری دادگا ڕێکخراوە، تەنها ئەوکەسانە دەگرێتەوە کە فەرمانبەرن و بونەتە کەفیلی هاووڵاتی و تەنها بۆ سێ جۆر قەرزە کە ئەوانیش قەرزی (خانووبەرە، نیشتەجێبوون ، هاوسەرگیری).

بەڕێوبەرايەتييەکە باسی لەوەشکردووە: بەپێی ڕێنماییەکە قەرزار ئیجبار نەکراوە لەماوەی دوو مانگەکە هەموو قەرزەکە بگەڕێنێتەوە، ئەگەر هەر کەسێ نەیتوانی لەو ماوەیە قەرزەکە بداتەوە دەتوانێت لەگەڵ کەفیلەکەی ڕێک بکەوێت و مانگانە ئەو بڕە پارەیە بداتە کەفیلەکە کە لەمووچەکەی دەبڕدرێت.

وتيشی “هیچ گۆڕانکاریەکی جیاوازو بنەڕەتی لە شێوازی وەرگرتنەوەی قەرزەکان نەکراوە و کەسی کەفیلیش بە ویستی خۆی ئەو پابەندێتیەی خستۆتە ئەستۆی خۆی، بەپێی یاساش وەزارەتی دارایی و بانکە پسپۆڕیەکان دەسەڵاتی لێخۆشبونیان لەهیچ بڕێکی قەرزەکە نییە”.