سبەی شاندی هەرێم بۆ مووچە و شایستە داراییەكان سەردانی بەغداد دەكات

SNN

سبەی وەفدێكی حكومەتی هەرێم بەمەبەستی گفتوگۆكردن لەسەر مووچەی فەرمانبەران و شایستە داراییەكانی هەرێمی كوردستان سەردانی بەغداد دەكات، وتەبێژی حكومەتی هەرێمیش دەڵێت، بەغداد هیچ پاساوێكی نەماوە بۆ نەناردنی شایستە داراییەكانی هەرێم.

پێشەوا هەورامانی، وتەبێژی حكومەتی هەرێمی كوردستان لە لێدوانێكی تایبەتدا بە كوردساتی راگەیاند، سبەینێ وەفدی حكومەتی هەرێم سەردانی بەغداد دەكات بەمەبەستی گفتوگۆكردن لەسەر رەوانەكردنی مووچەی فەرمانبەران و شایستە داراییەكانی هەرێم.

وتیشی، هەروەها رۆژی یەكشەممەی داهاتوو وەفدێكی دیكەی هەرێمی كوردستان بەمەبەستی گفتوگۆكردن لەسەر رەشنوسی یاسای نەوت و غازی فیدڕاڵی، سەردانی بەغداد دەكات و لەگەڵ وەزارەتی نەوت كۆدەبێتەوە.

وتەبێژی حكومەتی هەرێم وتیشی، ئەوان چاوەڕێدەكەن بەمزووانە بەغداد مووچە و شایستە داراییەكانی هەرێمی كوردستان بنێرێت، چونكە هیچ پاساوێكیان بۆ حكومەتی عێراق نەهێشتووەتەوە كە بیكاتە بیانوو بۆ نەناردنی شایستە داراییەكانی هەرێم.