شانەی قەیرانەکانی پەرلەمانی عێراق لەبارەی کۆرۆناوە هۆشداری دەدات
سوریا بەرزترین رێژەی تووشبوون بەکۆرۆنا لەڕۆژێکدا تۆمار دەکات
SNN
ئەمڕۆ، لەگەڵ تۆمارکردنی سەدان حاڵەتی نوێی کۆرۆنا لە عێراق، شانەی قەیرانەکانی پەرلەمان داوای کۆبوونەوەی بەرپرسانی حکومەتی کرد.
حسێن کەریم کەعبی سەرۆکی شانەی قەیرانەکانی پەرلەمان ئەمڕۆ لە راگەیەندراوێکیدا وتوویەتی: “پێویستە وەزارەتی تەندروستی عێراق لەگەڵیاندا، سەبارەت بە بەرزبوونەوەی مەترسیدارانەی ژمارەی تووشبووان بە کۆرۆنا کۆببێتەوە”.
ناوبراو رەخنەی لە رێکارە تەندروستییەکانی کۆرۆنا لە عێراق گرتووە و وتوویەتی: “رێکارەکان زۆر بە خاوی جێبەجێکراون و جددی نەبوون”، ئەوەش بە هۆکاری بەرزبوونەوەی ژمارەی تووشبووان دەزانێت، بەتایبەت لە بەغدا.
سەرۆکی شانەی قەیرانەکانی پەرلەمان، هۆشداری لە روودانی “کارەساتێکی مرۆیی” لە عێراق داوە، کە ببێتە هۆی هەرەسهێنانی کەرتی تەندروستی.
داواشدەکات دەستبەجێ پلانێکی واقیعانە بۆ رێگریکردن لە تەشەنەکردنی زیاتری کۆرۆنا جێبەجێ بکرێت، کە لەگەڵ بارودۆخی ئێستای عێراقدا بگونجێت.
ئەمە لەکاتێکدایە ئەمڕۆ وەزارەتی تەندروستی عێراق 322 حاڵەتی نوێی کۆرۆنای تۆمارکرد.
