کوێستان محەمەد: وەزارەتەکەمان بەرپرسە لە بەدیهێنانی ئامانج و ماف و ئیمتیازاتی خاوەن پێداویستییە تایبەتەکان

SNN-

وەزیری کاروکاروباری کۆمەڵایەتی حکومەتی هەرێمی کوردستان پیرۆزبایی لە کەمئەندامان و خاوەن پێداویستییە تایبەتەکان و كورتە باڵاكان دەکات و دەڵێت:” ئەم یادە پەیوەندی راستەوخۆی بە هەموومانەوە هەیە و وەزارەتمان بە هەماهەنگی و پێکەوەیی لەگەڵ وەزارەتەکانی تری حکومەتی هەرێمی کوردستان، بەرپرسە لە بەدیهێنانی سەرجەم ئامانج و ماف و ئیمتیازاتی خاوەن پێداویستی یە تایبەتەکان لە هەرێمی كوردستان.”.

کوێستان محەمەد، وەزیری کاروکاروباری کۆمەڵایەتی لە روونکردنەوەیەکدا دەڵێت:” ڕۆژی جیهانی خاوەن پێداویستییە تایبەتەکان دەرفەتێکە بۆ هەموومان کە سەرنجمان لەسەر پێویستی بەرەو پێشبردنی یەکسانی و باشترکردنی ژیانی ئەو تاکانە بێت کە ڕۆژانە ڕووبەڕووی ئاستەنگ دەبنەوە، لەم چوارچێوەیەدا پێویستە بیر لە پابەندبوونمان بکەینەوە بە ئاراستەی دروستکردنی کۆمەڵگایەکی گشتگیر و هاودەنگ”

“هەموو تاکێک لە کۆمەڵگای ئێمەدا مافی ئەوەی هەیە کە بە خۆشگوزەرانیەوە بژی و سەرجەم مافەکانی وەربگرێت بەبێ گوێدانە هەر جیاوازییەک کە هەیبێت، ئێمە لە وەزارەتی كار و كاروباری كۆمەڵایەتی یەوە جەخت لەسەر دابینکردنی دەرفەت و پشتیوانییەکی گونجاو بۆ ئەو کەسانە دەکەینەوە کە پێویستی تایبەتیان هەیە، دروشمی وەزارەتمان (کەمئەندامان شایانی ڕێزن نەک بەزەیی)و پێویستە و لەسەرمانە وەک هەر کەسێکی تری کۆمەڵگا پشت گیریان لێبکرێت و تواناکانیان دەربخرێت و پەرەی پێبدرێت” کوێستان محەمەد. وادەڵێت.

راشیگەیاند، لەم بۆنەیەدا جێی خۆیەتی بڵێم یەكێك لە دەستكەوتەكانی تری وەزارەتمان بۆ ئەم توێژە پەسەندكردنی پەیرەوی سندوقی چاودێری و شیاندنی کەم ئەندامان و خاوەن پێداویستی تایبەت و کورتە باڵاکانە کە یه‌كێكی تره‌ له‌ خزمه‌تگوزاریه‌كانی حکومەتی ھەرێمی کوردستان و ده‌ستكه‌وتێكی مه‌زنه‌ بۆ به‌رژه‌وه‌ندی کەمئەندامان و خاوەن پێداویستی تایبەت و کورتەباڵاکان، ئامانجیش کۆکردنەوەى داهات و خەرجکردنەوەیەتى بۆ پێشکەشکردنی خزمەتگوزاریی پێویست بۆ کەسانی کەمئەندام و خاوەن پێداویستیی تایبەت و کورتە باڵایان، تا بگەنە ئاستی بەرەوپێشچوون و شیاندنەوەی كۆمەڵایەتی.

ئاماژەی بەوەشکرد، بەم بۆنەیەوە پێویستە هەمومان پێکەوە کاربکەین بۆ پێشکەشکردنی ئەو پشتگیری و ئاسانکاریانەی کە ئەم تاکانە پێویستیانە تا بتوانن پەرە بە تواناو داهێنانەکانیان بدەن، زەمینە سازیان بۆ برەخسێنین و خۆیان بسەلمێنن.