باران زۆربەی ناوچەکانی هەرێم دەگرێتەوە

SNN

پێشبینی دەکرێت سبەی شەممە باران بارین تەواوی ناوچەكانی هەرێمی كوردستان بگرێتەوە كە هەندێك كات دابارین بەشێوەی لێزمە باران دەبێت و پلەكانی گەرماش بەچەند پلەیەك نزم دەبنەوە.

بەشی پێشبینی کەش و هەوا لە وەزارەتی گواستنەوە و گەیاندنی حکومەتی هەرێم بڵاویکردەوە، ئەمڕۆ هەینی، ئاسمان بەگشتی نیمچەهەور دەبێت و پلەکانی گەرما بە نزیکەی 1 تا 2 پلە بەرزتر دەبن لە تۆمارکراوەکانی دوێنێ.

بەپێی راگەیەندراوەكە، سبەی شەممە، ئاسمان هەوری باراناوی دەبێت لە تەواوی ناوچەکەمان و لە کاتەکانی بەیانی زودا لە ئەنجامی هاتنی نزمە پاڵپەستۆیەک بۆ سەر ناوچەکەمان سەرەتا باران بارینێکی مامناوەند لە باکووری ڕۆژئاوای هەرێم دەستپێدەکات و پاشان تەواوی ناوچەکەمان دەگرێتەوە، هەندێک کات لێزمە باران دەبێت بەتایبەت لە سنوری پارێزگای دهۆک کە پێشبینی دەکرێت زۆرترین ڕێژەی دابارین لە سنوری ئەو پارێزگایە بێت.

ئاماژەی بەوەشداوە كە سبەی پلەكانی گەرما بە 2 تا 4 پلە نزمتر دەبن لە چاو تۆماركراوەكانی ئەمڕۆ.

بەرزترین پلەکانی گەرمای پێشبینیکراو بۆ سبەی بەم جۆرە بن: ھەولێر: 17، سلێمانی: 16، دھۆک: 15، کەرکوک: 18، ھەڵەبجە: 17، سۆران: 15، گەرمیان: 21 پلە.