چوار چەکداری داعش لەکەرکوک دەستگیرکران

SNN-عیماد جەباری

لەلایەن هێزێکی حەشدی شەعبیەوە چوار چەکداری داعش لەکەرکوک دەستگیرکران کە یەکێکیان سەرکردەیەکی ئەو چەکدارانەیە.

جەودەت عەسافی وتەبێژی لیوای ١٦ی حەشدی تورکمان بە snnی راگەیاند: لەلایەن هێزەکانی حەشدەوە چوار چەکداری داعش لە ماڵێکی باشوری کەرکوکدا دەستگیرکراون.

وتیشی، لەنێو دەستگیرکراوەکاندا سەرکردەیەکی باڵای داعشی تێدایە کە یاریدەدەری والی تەلەعفەری داعشە.

ئەوەشی خستەڕوو کە لێکۆڵینەوەکانیان لەگەڵ دەستگیرکراوەکاندا دەستیپێکردوە و تاکۆتایی هاتنیشی ناسنامەکانیان ئاشکرا ناکەن.

لە ماوەی چەند مانگی رابردوودا رێکخراوی داعش چالاکی و هێرشەکانی لە ناوچەکێشە لەسەرەکان و ناوەڕاست و باشووری عێراق زیادکردووە، هێزە ئەمنییەکانیش هەوڵەکانیان بۆ تێکشکاندنی شانە نوستووەکانی ئەو رێکخراوە چڕکردووەتەوە.