ئەردۆغان بەڵێنی زیادکردنی ئاستی نەوتی لە کێڵگەیەکی کوردستاندا

SNN

سەرۆککۆماری تورکیا لە وتارێکیدا لە پارێزگای زۆنگوڵداکی وڵاتەکەی رایگەیاند، تاوەکو کۆتایی ساڵی 2024 بەرهەمی رۆژانەی نەوت لە گابار دەگەیەنینە 100 هەزار بەرمیل.

رەجەب  تەیب ئەردۆغان، سەرۆکی ئاکپارتی و سەرۆککۆماری تورکیا لە میانی هەڵمەتی بانگەشەکان بۆ هەڵبژاردنی شارەوانییەکان رایگەیاند، بەرهەمی ڕۆژانەی نەوتمان لە گابار لە 35 هەزار بەرمیل تێپەڕیوە، ئامانجمانە تاکۆتایی ساڵی 2024 بیگەیەنینە 100 هەزار بەرمیل لە رۆژێکدا.

لە درێژەی قسەکانیدا دەڵێت، “گرنگترین ئامانجی ئێمە بەدەستهێنانی سەربەخۆیی تەواوە لە بواری وزەدا، هەندێک هەنگاوی بوێرانەمان لەپێناو ئاسایشی وزەی تورکیادا ناوە.”

تورکیا سەرەتای ئایاری 2023 دۆزینەوەی کێڵگەیەکی نەوتی لە ناوچەی گاباری سەر بە پارێزگای شرنەخی باکووری کوردستان راگەیاند، بەگوێرەی ئاماری وەزارەتی وزە و سامانە سرووشتییەکانی تورکیا، یەدەگی نەوتی شرنەخ 150 ملیۆن بەرمیلە.