هۆشداری دەدرێت لە هاتنی شەپۆلێكی بەهێزی باران و بەفربارین لەم هەفتەیەدا
باران و لافاو
SNN-عەلی حەمە سەعید
شارەزایەكی بواری كەشناسی هۆشداری دەدات لە هاتنی شەپۆلیكی بەهێزی بەفروباران بارین كە لە ئەنجامی یەكگرتنی دوو شەپۆلی دەریای سور و دەریای ناوەڕاست شەپۆلە بەهێزەكە دروستدەبێت و ڕێژەی باران بارین لە هەندێك ناوچە دەگاتە 300 ملم، هاوكات لە چوار شەممەی ئەم هەفتەیەوە باران بارین دەستپێدەكات و تا سەرەتای هەفتەی داهاتوو كاریگەری دەمێنێتەوە و پاشان شەپۆلی دیكەی باران بارین بەدوای خۆیدا دەهێنێت.
شاڵاو هیدایەت، شارەزا لە بواری كەشناسی بە SNNی ڕاگەیاند: لەچەند ڕۆژی داهاتووی ئەم هەفتەیە بەدیاركراوی لە ڕۆژی چوار شەممەوە لە ئەنجامی هاتنی دوو شەپۆلی بەفروباران لە دەریای سور و دەریای ناوەڕاست و پاشان یەكگرتنی ئەو دوو شەپۆلەوە ڕێژەیەكی زۆر لە باران بارین لەسەرجەم ناوچە جیاوازەكانی هەرێمی كوردستان دەبارێت و دەبێت لایەنە پەیوەندیدارەكان ئامادەكاری تەواو بكەن لە هاتنی ئەم شەپۆلە لە ئەگەری ڕوودانی لافاو كۆبوونەوەی زۆری لەسەرتاسەری تەواوی هەرێم و ناوچەی گەرمیان.
ئاماژەی بەوەشكرد، سەرەتای گەیشتنی شەپۆلەكە لە ڕۆژی چوارشەممەی ئەم هەفتەیە دەبێت پاشان تا كۆتایی هەفتە شەپۆلی باران بارینە كە زیاتر بەهێزدەبێت لەگەڵ زیاد بوونی خێرایی با و ڕودانی هەورە بروسكەی زۆر توند و تەرزەو لەگەڵ بارینی بەفر لە لوتكەی چیا بەرزەكانو ناوچە سنووریەكان، هاوكات ئەمە بۆ یەكەمجارە لەمساڵدا هەردوو شەپۆلی دەریای سورودەریای ناوەڕاست بەشێوەیەكی بەرفراوان پێكەوە دێن و یەكدەگرن و قوڵ دەبنەوە لەسەر تەواوی ناوچەكان.
ئەو شارەزایەی بواری كەشناسی ئەوەشی خستەڕوو، بەهۆی ئەو دوو شەپۆلە باران بارینەی ئەم هەفتەیەوە ڕێژەی باران بارین لە نێوان 50 ملم بۆ كەمترین و 300 ملم بۆ زۆرترین دەبێت هەر بەو هۆیشەوە ئەو كانیاو چەمانەی كە تا ئێستا نەبووچاونەتەوە بەهۆی ئەو شەپۆلی باران بارینەوە دەبوژێنەوە و مەترسی وشكە ساڵی لەسەر باشور و ناوەڕاستی گەرمیانیش كۆتایی پێ دێنێت و دەڕوێنێتەوە.
