ترەمپ هەڕەشەی بەکارهێنانی هێز دەکات دژی خۆپیشاندەران

SNN–

سەرۆکی ئەمریکا هەڕەشەی بەکارهێنانی هێز دەکات دژی خۆپیشاندەران کە چەند رۆژێکە ژمارەیەک شار و ویلایەتی وڵاتەکەی گرتۆتەوە بەهۆی کوژرانی کەسێکی بەڕەگەز ئەفریقی بەناوی جۆرج فلۆید لەلایەن پۆلیسێکەوە.

دۆناڵد ترەمپ لەتویتێکیدا دەڵێت: “لەسەر سەرۆک شارەوانی و پارێزگارەکان پێویستە جوڵە بکەن بۆ راگرتنی توندوتیژی، ناکرێت کەسێک لەویلایەتێکی دیکەوە بێت و هانی کاری خراپ بدات، گەر ئەوەتان پێ نەکرا، ئەوا هێزی سەربازی فیدراڵی بەکاردێنم”.

سەرۆکی ئەمریکا ئەوەشی ئاشکرا کردووە “80٪ی ئەوانەی خۆپیشاندان دەکەن لەدەرەوە هاتوون و بۆ تاڵانی و ئاژاوە هاتوون بۆ شاری مینیاپۆلیس و زیانیان هەیە بۆ کەسانێک کە حەز بەژیان دەکەن”.

خۆپیشاندانەکانی ئەمریکا بۆ داکۆکیکردن لە مافی رەشپێستەکان و سەرکۆنەکردنی رووداوی کوشتنی رەشپێستێک لەلایەن پۆلیسەوە فراوانتر بوون، لانی کەم لە 30 شاری ئەمریکا ئەنجام دەدرێت.

خۆپیشاندانەکان لە کاردانەوەی رووداوێکدایە، کە بەپێی گرتەڤیدیۆیەک، دوو پۆلیسی شاری مینیاپۆلیس پیاوێکی رەشپێستیان دەستگیرکردووە و لەسەر دەم بە زەوییاندا داوە. ئەگەرچی پیاوە رەشپێستەکە هاواردەکات، کە ناتوانێت هەناسە بدات، بەڵام پۆلیسەکان پشتگوێی دەخەن و بەوەش، گیانیلەدەستدا.