وەزارەتی پەروەردە بڕیاری لەبارەی بەشداریپێکردنی گشتی خوێندکارانی 12ی ئامادەیی دا

SNN

وەزارەتی پەروەردە بڕیاریدا خوێندکارانی پۆلی 12ی ئامادەیی، ئەوانەی دەرچوون و ئەوانەشی تا سێ وانە کەوتوون داخڵی تاقیکردنەوە گشتییەکان بکرێن.

لە فەرمانێکی وزاریدا وەزارەتی پەروەردە بڕیاریدا بەوەی، خوێندکارانی 12ی ئامادەیی، بە هەموو بەشەکانیانەوە، ئەوانەی دەرچوون و ئەوانەشی تا سێ وانە لە وەرزی یەکەم دەرنەچوون، داخڵی تاقیکردنەوە گشتییەکان (وەزاری) بکرێن و پێویست ناکات تاقیکردنەوەی وەرزی دووەم ئەنجام بدەن.

هاوکات وەزارەتی پەروەردە رایگەیاندووە، تەنها بۆ ئەمساڵی خوێندن 10 نمرە بڕیار دەدرێت بە خوێندکارانی قۆناغی 12ی ئامادەیی، ئەو 10 نمرەی بڕیارە بۆ تاقیکردنەوەکانی وەرزی یەکەمە و پاش ئەنجامدانی تاقیکردنەوەی وەرزی دووەمیش دەگرێتەوە.

پاش سوودمەندبوون لە 10 نمرەی بڕیار، ئەو خوێندکارانەی لە سێ وانە زیاتر دەرنەچوبێتن لە وەرزی یەکەم، واتە چوار وانە و زیاتری کەوتنیان هەبێت، لە رۆژی یەکشەممە، 7ی ئایارەوە تاقیکردنەوەی وەرزی دووەم ئەنجام دەدەن.

تاقیکردنەوەکان دەبێت بە گوێرەی رێنمایی تەندروستی بێت و خوێندکاران بە بێ ماسک و دەستکێش ناتوانن بەشداری تاقیکردنەوەکان بکەن.

لە دوایین بڕیاری وەزارەتەکەشدا هاتووە: تاقیکردنەوەکانی وەرزی دووەمی قۆناغی پێنجەمی پەیمانگا حکومی و ناحکومییەکان بۆ 28ی ئایاری 2020 دوادەخرێت.