مۆلیدە ئەهلییەكانی پارێزگای هەڵەبجە مانگرتنیان له‌ كاركردن راگەیاند

SNN – عەلی حەمە سەعید
لە بەرامبەر رێكنەكەوتنی لیژنەی مۆلیدە ئەهلییەكان و خاوەن مۆلیدەكان لەسەر دیاریكردنی نرخی كاتژمێرەكانی كاركردن، مۆلیدە ئەهلییەكانی پارێزگای هەڵەبجە مانگرتنیان لە كاركردن دەستپێكرد و سەرۆكی لیژنەی مۆلیدە ئەهلییەكانیش دەڵێت: “لە بەرژەوەندی هاووڵاتییان ناهێڵین نرخەكان بەرزبكرێنەوە”.

جەلال عەبدولڕەحمان، سەرۆكی لیژنەی مۆلیدە ئەهلییەكانی پارێزگای هەڵەبجە، بە (SNN)ی راگەیاند: “ئەمڕۆ مۆلیدە ئەهلییەكانی پارێزگای هەڵەبجە دەستیان بە مانگرتن كرد و كاریان بە مۆلیدەكانیان نەكرد، ئەوەش بەهۆی ئەوەی خاوەن مۆلیدە ئەهلییەكان داوای بەرزكردنەوەی نرخ دەكەن و ئێمەش رێگە نادەین نرخەكان بەرزبكەنەوە لەپێناو بەرژەوەندی هاووڵاتییاندا”.

وتیشى: ” لە پارێزگای سلێمانی بۆ هەر كاتژمێرێك كاركردنى مۆلیدە ئەهلییەكان بڕی 32 دینار دیاریكراوە، ئێمە دینارێك لە پارێزگای سلێمانی زیاترمان بۆ داناون بۆمان كردوون بە 33 دینار، بەڵام بەمە رازینابن و داوای بڕی 34 دینار و نیو دەكەن، ئێمەش بەمە رازینابین و ناهێڵین هاووڵاتییان زۆریان لەسەر بكەوێت”.

سەرۆكی لیژنەی مۆلیدە ئەهلییەكانی پارێزگای هەڵەبجە ئەوەشی خستەڕوو: “لەگەڵ قایمقامی قەزای ناوەندی پارێزگای هەڵەبجە قسەمانكردووە ئەویش هاوڕایە كە نابێت نرخەكان لەسەر هاووڵاتیيان زیادبكرێن، بۆیە لە هەوڵی چارەسەر كردنی گرفتەكەداین بەجۆرێك هاووڵاتیان نرخیان لەسەر زیاد نەكرێت”.