ئەمریکا: عێراق لە شەڕی داعشدا پێویستی بە پشتیوانی زیاترە

SNN

ئیدارەی ئەمریکا داوای لە هاوپەیمانەکانی کردووە بەردەوام بن لە هاوکارییە داراییەکانیان لە شەڕی دژ بە چەکدارانی داعش و دەڵێت: “عێراق هێشتا پێویستی بە پشتیوانییە”.

مایک پۆمپەیۆ وەزیری دەرەوەی ئەمریکا لە میانی بەشداریکردنی لە کۆڕبەندی هاوپەیمانێتی دژ بە داعش، کە لەلایەن ئەمریکا و ئیتاڵیاوە بەڕێوەبرا، رایگەیاند: “راستە پەتای کۆرۆنا بارگرانییەکی قورس بووە لەسەر بودجەی تەرخانکراوی تایبەت بە شەڕی داعش، بەڵام پێشتر بەڵێنمان داوە لە ساڵی 2020 دا بڕی زیاتر لە 700 ملیۆن دۆلار بۆ ئەو شەڕە تەرخان بکەین”.

پۆمپەیۆ بە نوێنەرانی 31 وڵاتی بەشدار لە هاوپەیمانێتی دژ بە داعشی وت: “پێویستە شانە نوستووەکانی داعش لە عێراق و سوریا ریشەکێش بکرێن و سەقامگیری بۆ ناوچە ئازادکراوەکانی ئەو دوو وڵاتە بگەڕێندرێتەوە”.

وتیشی، داعش لە سنووری نێوان عێراق و سوریا لە هەوڵی یەکخستنەوەی ریزەکانیدایە.

ئەم داوایەی وەزیری دەرەوەی ئەمریکا لەکاتێکدایە، پەتای کۆرۆنا زیانی بە ئابووری وڵاتانی ئەندام لە هاوپەیمانێتی داعش گەیاندووە.