حکومەتی هەرێمی کوردستان: 11 گەنجی دیکە لە وڵاتی لیبیا دەگەڕێنرێنەوە هەرێمی کوردستان
SNN –
دوای بەدواداچوونی وەزارەتی ناوخۆ و فەرمانگەی پەیوەندییەکانی دەرەوە، مامەڵەی گەڕانەوەی 11 گەنجی بێسەروشوێنبوو لە لیبیا تەواو بوو و لە چەند ڕۆژی داهاتوودا دەگەڕێنەوە، هاوکات گەڕان بەدوای 10 هاووڵاتی تریشدا بەردەوامە.
ئەمڕۆ دووشەممە 5ی تشرینی یەکەمی 2026، حکومەتی هەرێمی کوردستان ڕایگەیاند، دوای ئەوەی هەواڵی بێسەروشوێنبوونی کۆمەڵێک هاووڵاتی لە وڵاتی لیبیا بەدەستمان گەیشت، هەردوو وەزارەتی ناوخۆ و فەرمانگەی پەیوەندییەکانی دەرەوە ڕاسپێردران کە بەپەلە ڕێکاری پێویست بگرنە بەر بۆ دۆزینەوە، ڕزگارکردن و هێنانەوەیان. لە ئێستاشدا تەواوی مامەڵەکانی تایبەت بە هەر 11 گەنجەکە تەواو بووە و لە چەند ڕۆژی داهاتوودا دەگەڕێنرێنەوە هەرێمی کوردستان.
لە ڕاگەیەندراوەکەدا ئاماژە بەوە کراوە کە وەزارەتی ناوخۆ و فەرمانگەی پەیوەندییەکانی دەرەوە هەموو هەوڵ و توانایەکیان بۆ دۆزینەوە و سۆراخی 10 هاووڵاتی تری ڕاپەڕین چڕ کردووەتەوە کە ماوەیەکە بێسەروشوێنن، و بە هەماهەنگی لەگەڵ باڵیۆزخانەی عێراق لە لیبیا و لە ڕێگەی نوێنەرایەتییەکانی حکومەتی هەرێمی کوردستانەوە گەڕان و بەدواداچوون بەردەوامە.
