عێراق لە حاڵەتی ئامادەباشیدایە.. سەرۆکوەزیران جەخت لەسەر بەهێزکردنی بەرگری ئاسمانی و درۆن دەکاتەوە

SNN-

فەرماندەی گشتیی هێزە چەکدارەکانی عێراق، فەرمانی بە سەرجەم هێزە ئەمنییەکان کرد لە باڵاترین ئاستی حاڵەتی ئامادەباشیدا بن، جەختیشی کردەوە کە توانای سەربازیی هاوچەرخ پشست بە هێزی ئاسمانی، درۆن و سیستمی بەرگریی پێشکەوتوو دەبەستێت.

نووسینگەی ڕاگەیاندنی سەرۆکوەزیرانی عێراق لە ڕاگەیەندراوێکدا بڵاویکردەوە، عەلی زەیدی، فەرماندەی گشتیی هێزە چەکدارەکان، سەرۆکایەتیی کۆبوونەوەیەکی فراوانی کردووە کە تیایدا بەڕێوەبەری نووسینگەکەی، بریکاری وەزیری پلاندانان، ژمارەیەک ڕاوێژکار و فەرماندەی باڵای سەربازی ئامادە بوون.

بەگوێرەی ڕاگەیەندراوەکە، لە کۆبوونەوەکەدا ئاستی ئامادەیی هێزە چەکدارەکان و پێداویستییەکانیان لە ڕووی تەکنەلۆژیا و کەرەستەی سەربازییەوە هەڵسەنگاندنی بۆ کراوە، بەتایبەت لە بەشەکانی هێزی ئاسمانی، هێزی دەریایی و بەرگریی ئاسمانی.

عەلی زەیدی لە کۆبوونەوەکەدا ئاماژەی بەوە داوە کە هاوکێشە سەربازییەکان لە جیهانی ئەمڕۆدا گۆڕاون و بڕبڕەی پشتی هێزی سەربازی ئیتر تەنها چەکی کۆن نییە، بەڵکو پەیوەستە بە بەهێزکردنی تواناکانی ئاسمانی، درۆن، سیستمەکانی بەرگریی ئاسمانی و سوودوەرگرتن لە تەکنەلۆژیای سەردەم، هاوکات بەڵێنی ئەوەشی داوە کە حکومەت هەموو پێداویستییەک بۆ پەرەپێدانی هێزە چەکدارەکان دابین بکات.