ژمارەیەك حەشارگە و تونێلی داعش لەناوبران

SNN

فەرماندەی هێزی وشكانیی عێراق رایگەیاند لە چوارچێوەی ئۆپراسیۆنەکانیان لە ناوچە سنوورییەكانی نێوان پارێزگاكانی كەركوك، سەڵاحەددین و دیالە ژمارەیەک حەشارگە و تونێلی داعش لەناوبراون و 12 چەکداری داعشیش کوژراوە.

لیوا روكن قاسم محەمەدی ئەمڕۆ لە لێدوانێكی رۆژنامەوانییدا رایگەیاند: “هێزە ئەمنییەكان ئۆپەراسیۆنێكی فراوانیان بە ئامانجی راوەدوونانی چەکدارانی داعش و پشكنینی ژمارەیەك ناوچە لە سنووری پارێزگاكانی سەڵاحەددین، دیالە و كەركوك ئەنجامداوە”.

وتیشی: “ئۆپەراسیۆنەكە بەپێی پلانێكی تۆكمە بە هاوبەشی لەنێوان هێزەكانی فەرماندەیی ئۆپەراسیۆنەكانی سەڵاحەددین، سامەڕا، فیرقەی نۆی زرێپۆش و هێزەكانی كۆماندۆ و پۆلیسی فیدرال و حەشدی شەعبی ئەنجامدراوە كە لە میانیدا پاڵپشتی ئاسمانی لەلایەن هێزی ئاسمانیی و فڕۆكە جەنگییەكانی سوپا دابین كرابوو، كاریگەریی لەسەر كەمكردنەوەی جموجۆڵی چەکدارانی داعش لەو ناوچانە دروستكردووە”.

لەلایەکی دیکەوە و هەر ئەمڕۆ عەمید یەحیا رەسول وتەبێژی فەرماندەی هێزە چەکدارەکانی عێراق رایگەیاند، 12 چەکداری داعش لە نزیک مەخموور کوژراون.

ئەمەیش دوای ئەوە دێت لە دوو رۆژی رابردوودا، هێزە عێراقییەكان قۆناغی دووەم و سێیەمی ئۆپەراسیۆنی “پاڵەوانەكانی عێراق”یان لە ناوچەكانی نێوان رۆژهەڵاتی سەحەڵادین و رۆژئاوای دیالە و باشووری رۆژئاوای كەركوك ئەنجامدابوو.