ئەمریکا سزای نوێ بەسەر ئێراندا دەسەپێنێت

SNN-

بەمەبەستی زیاتر سنووردارکردن و پیادەکردنی ئەوپەڕی فشار بۆ سەر وڵاتەکەی، ئەمڕۆ پێنجشەممە وەزارەتی خەزێنەی ئەمریکا کۆمەڵێک سزای نوێی بەسەر ئێراندا سەپاند.

وەزارەتی خەزێنەی ئەمریکا لەسایتی رەسمیی خۆی بڵاویکردۆتەوە کە هەشت کۆمپانیای ئێرانیی لەبوارەکانی ئاسن و پۆڵا و کانزای دیکەدا سزا دراون.

لەبەیاننامەیەکدا وەزارەتەکە رایگەیاندووە “رێوشوێنی توندی یاساییان دژی چوار کۆمپانیا گرتۆتەبەر لەبوارەکانی ئاسن و ئەلەمنیۆم کە لەبواری کەرتی وزەی ئێراندا کار دەکەن”.

هاوکات Mobarakeh Steel Company بەر سزاکە کەوتووە کە گەورەترین کۆمپانیای تەنە رەقەکانە لەئێران و چوار بریکاری کۆمپانیای (موبارەکە)ش سزاکە دەیانگرێتەوە کە لەدەرەوەی ئێران کار دەکەن.

کۆمپانیای موبارەکە ساڵی 2018 خرایە لیستی رەشەوە بەتۆمەتی ئەوەی کاری لەگەڵ کۆمپانیای میهری ئێرانیدا کردووە.