سەرۆک وەزیرانی فەڕەنسا دەستبەرداری پۆستەکەی بوو
ئێدوارد فیلیپ
SNN
ئێدوارد فیلیپ سەرۆک وەزیرانی فەڕەنسا دەستی لەکارکێشایەوە و سەرۆکی ئەو وڵاتەش گۆڕانکاری لە چەند پۆستێکی حکومیدا دەکات.
کۆشکی ئیلیزێی فەڕەنسا لە راگەیەندراوێکدا ئاماژەی بەوەکردووە، فیلیپ نامەی دەستلەکارکێشانەوەی پێشکەشی سەرۆک کۆمار کردووە، بەڵام تاوەکو دەستبەکاربوونی کابینەی نوێی حکومەت، کارەکان رایی دەکات.
ماڵپەڕی بی بی سی لەوبارەیەوە بڵاویکردەوە، دەستلەکارکێشانەوەی سەرۆک وەزیران لە چوارچێوەی کۆمەڵێک گۆڕانکاریدایە کە ئیمانوێل ماکرۆن، سەرۆکی وڵاتەکەیان دەستیپێکردووە و دەیەوێت لەو رێگایەوە بەڕەنگاری قەیرانی ئابووری ببێتەوە، کە بەهۆی پەتای کۆرۆناوە رووبەڕووی فەڕەنسا بووەتەوە.
ئێدوارد فیلیب ماوەی سێ ساڵبوو پۆستی سەرۆک وەزیرانی فەڕەنسای بەڕێوەدەبرد.
بڕیارە لە ساڵی 2022دا ئیمانوێل ماکرۆن بەشداری لە هەڵبژاردنی سەرۆکایەتیدا بکات، چاوەڕوان دەکرێت کە قەیرانە تەندروستی و ئابوورییەکان کاریگەرییان لەسەر دەنگدەرانی هەبێت.
