بەبێ رەزامەندی، رێگە نادرێت پشکنینی کۆڕۆنا لە ناوەندە تەندروستییە ئەهلیەکان ئەنجامبدرێت
کۆرۆنا فۆتۆ هەوراز ئەحمەد
SNN-محەمەد مستەفا
بەڕێوەبەرایەتی گشتی تەندروستی راپەڕین ئاگاداری سەرجەم نەخۆشخانە و تاقیگە ئەهلیەکانی سنووری ئیدارەی راپەڕین دەکاتەوە، کە بەبێ وەرگرتنی رازەمەندی وەزارەتی تەندروستی بەهیچ شێوەیەک رێگەیان پێنادرێت پشکنینی ڤایرۆسی کۆڕۆنا بۆ هاووڵاتیان ئەنجام بدەن .
تەها محەمەد بەرپرسی راگەیاندنی تەندروستی راپەڕین بە SNN ی راگەیاند: بەگوێرەی بڕیاری ژمارە (375) ی ئەنجومەنی وەزیران و لە پێناو رێگری زیاتر لە بڵاوبوونەوەی ڤایرۆسی کۆرۆنا، دەبێت ئەنجامدانی پشکنینی هاووڵاتیان بۆ دەستنیشانکردنی ڤایرۆسەکە تەنها لەلایەن ناوەندە تەندروستی و تاقیگەکانی حکومەتدا ئەنجام بدرێن و پێویستە لەژێر چاودێری راستەوخۆی وەزارەتی تەندروستیدابێت.
ووتیشی ” بە گوێرەی بڕیارەکە رێگە بەهیچ پشکنینێکی ڤایرۆسی کۆڕۆنا نادرێت کە لە نەخۆشخانە و تاقیگە ئەهلیەکان ئەنجام بدرێت تەنیا لەو حاڵەتەدا نەبێت کە ئەو ناوەند و تاقیگە ئەهلیانە رەزامەندی وەزارەتی تەندروستیان هەبێت و بە پێچەوانەوە رووبەڕووی سزای یاسای دەکرێنەوە ”
ِباسی لەوەشکرد: لەکاتی بوونی هەر حاڵەتێکی گوماناوی یاخود بەرکەوتووی تووشبووانی ڤایرۆسەکە، ئەوا تیمە تایبەتیەکانی تەندروستی راپەڕین خۆیان پشکنینی ڤایرۆسی کۆڕۆنا بۆ گومانلێکراوان ئەنجامدەدەن.
