تەندروستى سلێمانى لەبارەی رۆژانی جەژنەوە هۆشداریدەدات

SNN-هەوراز ئەحمەد

وتەبێژى تەندروستیی سلێمانى رایدەگەیەنێت: “ئەگەر هاووڵاتییان پابەند نەبن بە رێنماییە تەندروستیەکان لە رۆژانى جەژنى قورباندا، دەگەڕێینەوە خاڵى سفر و دۆخى کۆرۆنا دیسان لە کۆنترۆڵ دەردەچێت”.

یاد نەقشبەندى، وتەبێژى تەندروستیی سلێمانى ئەمڕۆ لە وەڵامی پرسیارێکی پەیامنێری SNN، رایگەیاند: “لە نەخۆشخانەکانى تایبەت بە کۆرۆنا لە شارى سلێمانى لە ئێستادا 114 تووشبووى تێدا ماوە، زۆربەیان دۆخى تەندروستیان جێگیرە و رێژەى تووشبوون و مردن بە کۆرۆنا کەمبووەتەوە”.

وتیشى: “پێوستە هاووڵاتییان پابەندبن بە رێنمایە تەندروستیەکان لە رۆژانى جەژنى قورباندا، ئەگەر تێکەڵاوى و بەریەککەوتن و قەرەباڵغى دروستبکرێت ئەوا دەگەڕێینەوە خاڵى سفر و دۆخى کۆرۆنا دیسان لە کۆنترۆڵ دەردەچێت”.

لە بارەى ئەوەى پارێزگارى سلێمانى رایگەیاندوە: لە ناوەڕاستى مانگى ئابدا ژیان ئاسایى دەبێتەوە، وتەبێژى تەندروستى سلێمانى وتى: “کۆرۆنا لە سەر ئاستى جیهان تاوەکو ئێستا پێکوتەیەکەى بۆ نەدۆزراوەتەوە و تووشبوون و گواستنەوەى لە کەسێکەوە بۆ کەسێکى دیکە زۆر ئاسانە، بۆیە بڕیاردان لە بارەى سەرکەوتنى نەخۆشیەکە قورسە و هێشتا زووە بۆ ئەوەى بڕیار لەسەر ئاساییبوونەوەى ژیان بدرێت”.