وەزارەتی تەندروستیی هەرێم داوای راگەیاندنی قەدەغەی هاتووچۆ دەكات

SNN- مەودا مستەفا
وتەبێژی وەزارەتی تەندروستیی ڕایدەگەێنێت “ئەمڕۆ لیژنەی باڵای رووبەڕووبوونەوەی كۆرۆنا كۆدەبێتەوە. ئێمەش داوامان كردوە جارێكی تر قەدەغەی هاتووچۆ رابگەێنرێتەوە”.

ئەمڕۆ دووشەمە محەمەد قادر خۆشناو وتەبێژی وەزارەتی تەندروستیی حكومەتی هەرێمی كوردستان بەSNNی ڕاگەیاند: ئەمڕۆ لیژنەی باڵای رووبەڕووبوونەوەی كۆرۆنا لە پارێزگای هەولێر كۆدەبێتەوە چەند بڕیار و رێنماییەكی تایبەت بە دۆخی ئێستای كۆرۆنا ڕادەگەیەنرێت”.

وتیشی: “ئێمەش وەكو وەزارەتی تەندروستی داوامان كردووە جارێكی تر قەدەغەی هاتووچۆ رابگەیەندرێت” .
هێمای بۆ ئەوەشکرد “زۆربەی ئەو كەسانەی ئێستا تووشی كۆرۆنا دەبن پێویستیان بە داخڵبوون لە نەخۆشخانە هەیە و بەشێكیشیان پێویستیان بە ئۆكسجین و چاودێری چڕە”.

دەشڵێت: “لەم چەند رۆژەدا لە شوێنە گەشتیارییەكان قەرەباڵغی و بەریەك كەوتنی زۆر هەیە و هاووڵاتییان پابەند نابن، ئەمەش مەترسیدارە”.
ئەم كۆبوونەوەیە لە كاتێكدایە بەیانی ئەمڕۆ وەزیری تەندروستیی هەرێمی كوردستان بە SNN ی راگەیاند: دۆخی هەولێر لەژێر مەرتسیی گەورەدایە، چاوەڕاندەكرێت حاڵەتەكان بە شێوەیەكی بەرچاو زیاد بكەن.