ئاستى ئاوى زێى بچووك 40 سانتیمەتر زیادی کردووە
رووبارى زێى بچووك له ڕاپهڕین | فۆتۆ: SNN
SNN – محەمەد مستەفا
ماوەی سێ رۆژە ئێران بەشێک لە ئاوی زێی بچوکی بەرداوەتەوە و بە وتەی سەرپەرشتیاری پرۆژەی ئاوی خواردنەوەی قەڵادزێش “ئاستی ئاوی زێی بچوک بە رێژەی 40 سانتیمەتر زیادی کردووە”.
زانا عوسمان، سەرپەرشتیاری پرۆژەی ئاوی خاس کە پرۆژەی سەرچاوەی ئاوی خواردنەوەی دانیشتووانی قەڵادزێیە بە SNN ی راگەیاند: “مانگی رابردوو وڵاتی ئێران چەند جارێک ئاوی زێی بچوکی لە بەنداوی کۆڵەسەی شاری سەردەشتی ڕۆژهەڵات گرتهوە و بەو هۆیەشەوە ئاستی ئاوی زێی بچوک بە رێژەیەکی زۆر کەمیکرد و چەند جارێک تووشی گرفتی دابینکردنی ئاوی خواردنەوە بۆ دانیشتووانی قەڵادزێ بووین”.
وتیشی: “ماوەی 3 رۆژە ئێران بەشێک لە ئاوی زێی بچوکی لە بەنداوی کۆڵەسە بەردەواتەوە بەو هۆیەشەوە ئاستی ئاوی زێی بچوک لە سنووری قەزای پشدەر 40 سانتیمەتر بەرزبووهتەوە”.
سەرپەرشتیاری پرۆژەی ئاوی خاس باسی لەوەشکرد: “لە ئێستا بەربەستێکی کاتی لەسەر زێی بچوک دروستکراوە بۆ گلدانەوەی ئاو بۆ پرۆژەی ئاوی خواردنەوەی قەڵادزێ و بڕە ئاوی پێویست بۆ پرۆژەکە گلدراوهتهوه”.
ساڵانە و لە وەرزی هاویندا وڵاتی ئێران بەشێکی زۆر لە ئاوی زێی بچوک دەگرێتەوە و بەو هۆیەشەوە قەڵادزی تووشی کێشەی کەمی ئاوی خواردنەوە دەبێتەوە و ئەمساڵیش چەند جارێک ئەم کێشەیە روویداوە.
