کازمی داوای ئاشکراکردنی بەپەلەی موڵک و سامانەکانی وەزیرەکانی عێراق دەکات

SNN

مستەفا كازمی سەرۆکوەزیرانی عێراق داوا لە وەزیرەكانی كابینەكەی دەكات فۆرمی ئەستۆپاكی پڕ بكەنەوە و موڵك و ماڵ و پارەكانیان ئاشكرا بكەن.

لەڕاگەیەنراوێكدا حەیدەر مەجید بەرپرسی نوسینگەی ئەمیندارێتی گشتی ئەنجومەنی وەزیرانی عێراق ڕایگەیاندووە: سەرۆك وەزیران داوای لەئەندامانی ئەنجومەنی وەزیران كردووە فۆرمى ئەستۆپاكی دارایی گشتی بۆ ساڵی 2020 پڕ بكەنەوە.

دەشڵێت: بڕیارەكە لە كۆبونەوەی هەشتەم كە لە چوارى ئەم مانگە بەڕێوەچووە دەركراوە و داوا كراوە فۆرمەكە پڕ بكرێتەوە و بەپەلەش ڕەوانەی دەستەی دەستپاكی عێراق بكرێت، حەیدەر مەجید باسی لەوەشكردووە، بڕیارەكە پاڵپشتە بەیاسایی دەستەی دەستپاكی ژمارە 30ی ساڵی 2011، لەبارەی دەستكەوتنی ماڵ و سامان بەشێوەیەكی نایاسایی.

بەپێی بڕگەی یەكەمی مادەی 16 ی یاساكە، لەسەر هەموو ئەوانە پێویستە كە فەرمانبەرن یاخود خاوەن پلەیەكی باڵای بنەڕەتی یاخود بەوەكالەتن فۆرمی ئەستۆپاكی پڕ بكەنەوە.