گرژییەکانی تورکیا و یۆنان قوڵتربوویەوە
SNN
وەزیری دەرەوەی تورکیا ڕایگەیاند، وڵاتەکەی تا کۆتایی ئەم مانگە هەموو رێکارەکانی دەرهێنانی نەوت و گاز لە رۆژهەڵاتی دەریای ناوەڕاست دەستپێدەکات، یۆنانیش داوای کۆبوونەوەی بەپەلەی یەکێتی ئەوروپا دەکات.
مەولود چاوشئۆغڵو، وەزیری دەرەوەی تورکیا ڕایگەیاند: “تورکیا مافی خۆیەتی بەردەوام بێت لە گەڕان بەدوای سەرچاوە سرووشتییەکان لەو شوێنانەی کە سنووری خۆیەتی، بۆیە تا کۆتایی ئەم مانگە هەموو رێکارەکانی دەرهێنانی نەوت و گاز لە رۆژهەڵاتی دەریای ناوەڕاست تەواو دەبێت”.
چاوشئۆغڵو ئاماژەی بەوەشکرد: هەوڵ و لێدوانەکانی وڵاتان لەسەر مافی تورکیا ئێمە ناوەستێنێت و پێشتر چۆن دەستبە کارەکان کراوە ئێستاش بەردەوامین”.
هاوکات نوسینگەی کیوریاکوس میتسوتاکیس، سەرۆکوەزیرانی یۆنان لە راگەیەندراوێکدا داوای کۆبوونەوەی بەپەلەی یەکێتی ئەوروپا دەکات لەسەر هەوڵەکانی تورکیا و دەڵێت “پێویستە جیهان دەستدرێژی و داگیرکارییەکانی تورکیا راگرێت”.
تورکیا دەستیکردووە بە گەڕان و دەرهێنانی نەوت و گاز لە رۆژهەڵاتی دەریای ناوەراست و یۆنانیش ئەو سنوورانە بە سنووری وڵاتەکەی دەزانێت، لەگەڵ ناردنی هێزی سەربازی تورکی بۆ لیبیا و رێکەوتنی لەگەڵ گروپێکی لیبیدا سەبارەت بە سنووری ئاوی لە دەریای ناوەڕاست، تورکیا جوڵە و هەوڵەکانی بۆ دۆزینەوە و دەرهێنانی نەوت و گاز لە دەریای ناوەراست چڕترکردووەتەوە.
