هەپەگە ناسنامەی فەرماندەیەکی ئاشکراکرد کە لە بۆردوومانەکەی سیدەکان گیانیلەدەستدا

SNN

هەپەگە ناسنامەی ئەو فەرماندەیەی خۆی ئاشکراکرد، کە لە ئەنجامی هێرشە ئاسمانییەکەی تورکیا لە 11ی ئاب لەگەڵ بەرپرسە سەربازییەکانی عێراق لەسیدەکان گیانیلەدەستدا، دەڵێت: “یەکێک بووە لە فەرماندەکانی هەرێمی خواکوڕک“.

هەپەگە لە راگەیەندراوێکیدا دەڵێت: “فەرماندەکە ناوی عەگید گارزان-ە و لە ماوەی 27 ساڵی گەریلایەتیدا بەشداری لە چەندین چالاکیدا کردووە، چەندین جار بریندار بووە”.

هەپەگە ئاماژە بەوە دەکات: “لە راگەیەنراوەکەی رۆژی 12ی ئابدا رامانگەیاندبوو، کە لە 11ی ئابدا هاوڕێمان عەگید گارزان، کە یەکێکە لە فەرماندەکانی هەرێمی خواکوڕک و لەگەڵ بەرپرسانی حکومەتی عێراق چاوپێکەوتنی ئەنجامدا، لە ئەنجامی هێرشەکەی دەوڵەتی داگیرکەری تورکدا کە هێزەکانی عێراقی بە ئامانج گرتبوو گیانیلەدەستداوە”.

راگەیەنراوەکە ژیاننامەی فەرماندەکەی هەپەگەی خستۆتەڕوو کە نازناوی عەگید گارزانی هەیە و ناوی تەواوی موراد کالکۆیە، لە ناوچەی قەرسی باکووری کوردستان لەدایکبووە.
ئێوارەی رۆژی سێشەممە، چەند فڕۆکەیەکی بێفڕۆکەوان لە ناوچەی برادۆست، ئۆتۆمبێلێکی پاسەوانی سنووری عێراقیان کردە ئامانج و بەهۆیەوە چەند پاسەوانێکی سنوور کوژراون کە عەمیدێک و عەقیدێکی کوردیان تێدا بوو.