وەزارەتی دەرەوەی فەڕەنسا ئیدانەی بۆردوومانەکەی تورکیا دەکات بۆ سەر خاکی هەرێم

SNN

وەزارەتی دەرەوەی فەڕەنسا ئیدانەی هێرش و پەلامارەکانی تورکیا دەکات بۆ سەر خاکی هەرێمی کوردستان و رایدەگەیەنێت “دۆخەکە بۆ پێشهاتێکی خەتەرناک هەنگاو دەنێت”.

لە بەیاننامەیەکدا وەزارەتی دەرەوەی فەڕەنسا رایدەگەنێت “پاریس بەتوندیی ئیدانەی بۆردوومانەکانی تورکیا دەکات بۆ سەر خاکی هەرێم و کوژرانی ئەفسەر و سەربازانی پاسەوانی سنوور بە پێشهاتێکی مەترسیدار دەزانین”.

ئێوارەی رۆژی سێشەممە، چەند فڕۆکەیەکی بێفڕۆکەوان لە ناوچەی برادۆست، ئۆتۆمبێلێکی پاسەوانی سنووری عێراقیان کردە ئامانج و بەهۆیەوە چەند پاسەوانێکی سنوور کوژران کە عەمیدێک و عەقیدێکی کوردیان تێدا بوو.

رۆژی چوارشەممەش به‌گوێره‌ی بەیاننامەیەکی وەزارەتی دەرەوەی عێراق، عه‌بدولكه‌ریم هاشم، بریكاری وه‌زاره‌تی ده‌ره‌وه‌ی عێراق یاداشتنامه‌یه‌كی پێشكه‌شی فاتیح یەڵدز، باڵیۆزی توركیا له‌ به‌غدا كرد و تێیدا به‌رپرسیارێتیی “دەستدرێژییە نه‌گریسه‌كه‌ی خسته‌ ئه‌ستۆی حكومه‌تی توركیا و داوای روونكردنه‌وه‌ی هۆكاره‌كانی و سزادانی ئه‌نجامده‌رانیشی كرد”.