روسیا وادەی فرۆشتنی ڤاکسینەکەی بە وڵاتان ئاشکرادەکات

SNN

سەرۆکی سندوقی وەبەرهێنانی روسیا رایگەیاند، ئەو ڤاکسینەی کە وڵاتەکەی دژ بە ڤایرۆسی کۆرۆنا بەرهەمیهێناوە لە مانگی ئەیلولدا بۆ هاووڵاتییانی روسیا بەکاردەهێندرێت، لە چەند مانگی داهاتووشدا دەست بە فرۆشتن و هەناردەکردنی بۆ دەرەوەی وڵات دەکرێت.

کیریل دمیتریڤ لە لێدوانێکیدا بۆ کەناڵی عەرەبیەی سعودی رایگەیاند: لە مانگی تشرینی دووەم و کانوونی یەکەمی ئەمساڵدا ڤاکسینی کۆرۆنا هەناردە بەسێک لە وڵاتانی جیهان دەکرێت.

وتیشی: “هەرکەسێک ئەو ڤاکسینەی پێبدرێت تا زیاتر لە یەکساڵ تووشی کۆرۆنا نابێت”.

سەبارەت بە بڕی ئەو ڤاکسینەی کە بەرهەمدەهێندرێت، دمیتریڤ وتی: “داوای یەک ملیار لەو ڤاکسینە کراوە، بەڵام ئێمە لەتواناماندایە تەنیا 500 ملیۆن ژەم لەو ڤاکسینە بەرهەمبهێنین”.

11ی ئەم مانگە ڤلادیمێر پوتین سەرۆکی روسیا رایگەیاند، وەزارەتی تەندروستی وڵاتەکەی رەزامەندی لەسەر بەکارهێنانی ڤاکسینی دژ بە کۆرۆنا نیشانداوە، ئەمەش دەبێتە یەکەم ڤاکسینی دژ بەو نەخۆشییە کە لە جیهاندا بەکاربهێنرێت.