دوای چاوەڕوانییەکی زۆر ئەمڕۆ بەشی فریاکەوتنی نەخۆشخانەی رانیە دەکرێتەوە

SNN– محەمەد مستەفا

دوای ناڕەزایەتییەکی زۆری هاووڵاتییانی رانیە لەبارەی کەرتی تەندروستی قەزاکە، بڕیارە دوا نیوەڕۆی ئەمڕۆ شەممە بەشی فریاکەوتنی نەخۆشخانەی رانیە بە رووی هاووڵاتییاندا بکرێتەوە و بەڕێوبەری تەندروستی راپەڕینیش بۆ SNN دەڵێت: “بەهۆی نەدانی مووچەوە ناتوانن دڵنیایی بدەن کە بایکۆتی پزیشکان و کارمەندان لە بەشی فریاکەوتن روو نادات .“

هیوا مەحمود بەڕێوەبەری گشتی تەندروستیی راپەڕین بە SNN ی راگەیاند: لەسەر بودجەی بەڕێوەبەرایەتی تەندروستی راپەڕین، بەشی فریاکەوتنی نەخۆشخانەی گشتی رانیە فرانکراوە و لە 4 قەرەوێڵەوە کراوەتە 19 قەرەوێڵە و فراوانکردنی بەشی بوەژانەوەی دڵ لە 8 قەرەوێڵەوە بۆ 14 قەرەوێڵە .

وتیشی: “سەبارەت بە بەردوامیی دەوامکردنی پزیشکان و کارمەندانی تەندروستی لە بەشی فریاکەوتنی نەخۆشخانەی رانیە ئەوان ناتوانن دڵنیایی لەو بارەیەوە بدەن، چونکە لە ئێستادا بەشێکی زۆری پزیشکان و کارمەندانی تەندروستی لە سنووری پارێزگای سلێمانی بایکۆتی دەوامیان کردووە .”