کاماڤینگا ریاڵ مەدرید بێهیوا دەکات

SNN Sport

یاریزانی یانەی رینی فەرەنسی، ئیدواردۆ کاماڤینگا، یانەی ریاڵ مەدرید بێهیوا دەکات و مانەوەی لە یانەکەی لە وەرزی داهاتوو دووپات دەکاتەوە.

پاش بڵاوبوونەوەی چەند راپۆرتێکی رۆژنامەوانی لەسەر چوونی ئەم یاریزانەی یانەی رین بۆ یانەی ریاڵ مەدرید، لە نوێترین لێدوانیدا کاماڤینگا دەڵێت:” 2 ساڵ لە گرێبەستەکەم ماوە، من وەکو یاریزانی رین دەمێنمەوە لە وەرزی داهاتوو، هیچ گرنگییەک بە پڕوپاگەندەکان نادەم تەنیا تۆپی پێ نەبێت،شتی راست و شتی تریش هەن کە هەڵەن دەگوترێن”.

ئەم قسانەی کاماڤینگا لە کاتێکدایە، یانەی ریاڵ مەدرید بڕیاریداوە لە گواستنەوەکانی ئەم هاوینە هیچ گرێبەستێک ئەنجام نەدات و تەنیا یاریزان بفرۆشێت، لەسەروی هەمووشیانەوە فرۆشتنی بەیڵ و جەیمس ردۆریگێزە، ئەمەش بەهۆی کەمبوونەوەی داهاتی یانەکە بەهۆی بڵاوبوونەوەی ڤایرۆسی کۆرۆنا.

ئیدواردۆ کاماڤینگا بەرەگەز ئەنگۆلییە، بۆ فەرەنسای خوار تەمەنی 21 ساڵان یاری کردووەو تەمەنی 18 ساڵە، لە یانەی رین یاری دەکات و یاریزانی هێڵی ناوەندە، یانەی شاهانە دەیەوێت بۆ شوێنی کاسێمێرۆ بیگوازێتەوە.