بۆردومانەکانى تورکیا 200 هەزار درەختى لە سنوورى بادینان لەناوبردووە

SNN – مەودا مستەفا

بەرپرسی رێکخراوێکى ژینگەى هۆشدارى دەدات لە زیانە ژینگەییەکانى بۆردومانەکانى تورکیا و دەڵێت: تەنیا لە سنوورى ناوچەى بادینان 200 هەزار درەخت زیانیان بەرکەوتووە و لەناوچوون.

ئاسۆ شکاک، سەرۆکی رێکخراوی ئاڤیاری ژینگەیی لە هەرێمی کوردستان بە SNNی راگەیاند: “بەهۆی بۆردومانەکانی تورکیا لە سنووری بادینان 200 هەزار درەخت و دار زیانیان بەرکەوتووە و لە ناوچوون، ئەمە سەرەڕاى ئەوەى بە هەزاران زیندەوەر و باڵندە سووتاون و گیانیان لەدەستداوە و بەشێکیشیان بەهۆی نەمانی خۆراکی پێویست کۆچیانکردووە بۆ ناوچەیەکی دیکە”.

وتیشى: “بەهۆى بۆردومانەکەوە زیانى زۆرى ژینگەى بەر ناوچەکە کەوتووە کە رەنگە نەتوانرێت بە ئاسانى قەرەبووبکرێتەوە”.

سەرۆکی رێکخراوی ئاڤیاری ژینگەیی ئەوەشى خستەڕوو: “ئێمە بەردەوام چالاکیمان دژی بۆردومانەکانی دەوڵەتی تورکیا ئەنجامداوە، بەڵام ئەوەى پێویستە ئەوەیە حکومەت و لایەنە سیاسیەکان گفتوگۆ لەگەڵ هەردوولایەن بکەن بۆ ئەوەی زیانی زیاتر بەر ژینگەی هەرێمی کوردستان نەکەوێت”.

سوپای تورکیا نزیکەی سێ مانگە دەستى بە هێرش و بۆردومان کردووە لە سنوورەکانی هەرێمی کوردستان بە بیانووی هەبوونی گەریلاکانی پارتی کرێکانی کوردستان، بەو هۆیەشەوە جگە لە زیانە گیانییەکان زیانێکی زۆر بە رەز و باخ و دارستان و ژینگەی ناوچەکە گەیشتووە.