لە پەروەردەیەکى هەولێر بڕى 10 ملیۆن دینار دیارنەماوە

SNN- مەودا مستەفا

لە پەروەردەى دەوروبەرى هەولێر بڕى 10 ملیۆن دینار دیارنەماوە و بەرێوەبەرى پەروەردەکەش دەڵێت: لیژنەیەکى لێکۆڵینەوەمان دروستکردووە بەمەبەستى بەدواداچوون و دۆزینەوەی پارەکە.

مامۆستا فەهمى سلێوەیی بەرێوەبەرى پەروەردەى دەوروبەرى هەولێر بە SNNى ڕاگەیاند: “رووداوەکە گەورە کراوە هەڵەیەک روویداوە و بڕێک پارە دیار نەماوە و ئێمەش لیژنەیەکمان بۆ دۆزینەوەى پارەکە پێکهێناوە لە کۆتایی کارەکانى لیژنە و ئەنجامى لیژنەکە بۆ رای گشتى رایدەگەیەنین”.

بەپێى زانیارەکانى SNN ئەو پارەیەى بڕدراوە بڕەکەى 10 ملیۆن دینارە کە لە نێو قاسەى پەروەردە براوە بەبێ ئەوەى دەرگا بشکێت و قاسەکەش شکابێت.

هاوکات، پەروەردەی دەوروبەری هەولێر داوای لە ژووری یاسایی خۆیانکردووە، کێشەکە یەکلایی بکەنەوە، بەڵام بە پێی نووسراوێک ژووری یاسایی وەڵامی داونەتەوە و دەڵێن، “لە توانای ئەواندا نییە و دەبێت دادگا یەکلایی بکاتەوە.”